01

Июль

2022

Жалал-Абадда бардык аймактарында тез татым жайлар текшерүүгө алынат

Бул тууралуу Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Эркин Маматаев бүгүн, 1-июлда өткөн облустук эпидемияга жана эпизоотияга каршы өзгөчө комиссиясынын отурумунда билдирди.

Ыйгарым укуктуу өкүлдүн орун басары облустук ооруларды алдын алуу жана мамлекттик санитардык-эпидемиологиялык көзөмөлдөө борборунун жетекчилигине Жалал-Абад шаарында катталган массалык уулануулардын келип чыгуу себептерин аныктоо, бардык тез татым, тамак-аш азыктарын сатуучу соода жайларындагы эрежелердин сакталышын карап чыгууну тапшырды. Эркинбек Маматаев жарандардын ден соолугу башкы орунда экенин айтып, ишкердик субъектилери менчигинин түрүнө карай аны сактоого тийиш экенин эскертти.

Алдыдагы күндөрү тийиштүү тармактардын кызматкерлеринен түзүлгөн комиссия Жалал-Абад облусунун бардык район-шаарларындагы тез татым даярдоочу жайлардын санитардык абалын көзөмөлгө алат. Анын жыйынтыгы менен эреже сакталбаган тамактануучу жайлар убактылуу жабылат.

Белгилей кетсек, азыркы учурда Жалал-Абад шаарындагы эки тез татым жайларда катталган уулануудан улам облустук клиникалык ооруканасында 22 адам дарыланууда. Ал эми шаарда 2-июлдан тарта тез татым сатуучу жайлар убактылуу ишин токтотот.