Кыргыз Республикасынын Премьер-министри Жоомарт Оторбаев Кыргыз Республикасынын жарандарын Курман айт майрамы менен куттуктады.

Куттуктоонун тексти:

Урматтуу мекендештер!

Сиздерди мусулмандардын ыйык майрамы - Курман айт менен куттуктап кетүүгө уруксаат этиңиздер.

Биздин ата-бабаларыбыз байыртадан Курман айтты майрамдап келишкен.

Бул күнү жалпы мусулмандар курмандык чалып, көзү өтүп кеткендерди эскеришет. Үйгө баш баккан ар-бир адам өзү менен кошо жакшылык алып келип, анын ээсине бата тилеп кетет.

Курман айтты майрамдоодо Жараткан кыргыз элине биримдик, тынчтык жана ынтымак алып келсин, ар-бир үй-бүлөдө бакубаттуулук ырыс-ынтымак орносун.

Курман айт убакытты үй-бүлө менен чогуу өткөрүүгө, дос-туугандык мамилени жаңыртууга жана дүйнөдөн өткөн жакындарыбызды эскерүүгө мүмкүндүк берет. Буга катар бул майрамда муктаж адамдарга, жетим-жесирлерге, кары-картаңдарга жардам берүү жагына да басым жасалаарын эстен чыгарбоо кажет.

Урматтуу мусулмандар! Кымбаттуу мекендештер!

Курман айт майрамыңыздар кут болсун, жалпыңыздардын үй-бүлөңүздөрдө бакыт жана ынтымак болуп, ал эми республикабызда туруктуулук жана гүлдөп-өнүгүү орун алсын.

КР Өкмөтүнүн Аппаратынын

Маалыматтык камсыздоо бөлүмү