Бүгүн, 22-августта, Кыргыз Республикасынын Премьер-министри Жоомарт Оторбаевдин төрагалыгы астында Кыргыз Республикасынын Өкмөтүнүн жыйыны өттү.

Күн тартибине ылайык, Юстиция министрлигине караштуу нормативдик-укуктук актыларды инвентаризациялоо боюнча ведомство аралык комиссиянын ишмердүүлүк жыйынтыктары тууралуу маселе каралды.

Аталган маселе боюнча баяндамачы катары КР юстиция министри Алмамбет Шыкмаматов чыкты.

Министр Өкмөт мүчөлөрүнө маалымдагандай, Нормативдик-укуктук актыларды инвентаризациялоо боюнча ведомство аралык комиссиясы Юстиция министрлигине караштуу, ал 2001-жылдан тарта иштеп келе жатат. Анын курамына министрлик жана ведомстволордун 40 ашуун өкүлү кирет жана катарда окумуштуулар жана тажрыйбалуу юристтер да бар.

Комиссиянын түзүлүү максаты Кыргыз Республикасынын нормативдик-укуктук актыларын инвентаризациялоо жолу аркылуу ар-кыл деңгээлдеги нормативдик-укуктук актылар аралык карама-каршылыктарды, бирдиктүү деңгээлдеги нормативдик-укуктук актылар ортосундагы коллизияларды жоюуга, ошондой эле жүргүзүлгөн талдоолор негизинде тийиштүү нормативдик-укуктук актылардын долбоорлорун иштеп чыгуу болуп эсептелет.

Ошондой эле маалымдалгандай, 2010-2014-жылдарга дейре Комиссиянын 12 жыйыны өткөрүлүп, анда нормативдик-укуктук актылардын 150 долбоору каралып, анын 127си кабыл алынган.

“Бирок Кыргыз Республикасынын нормативдик-укуктук актыларын инвентаризациялоо алкагындагы ишмердүүлүктүн жүргүзүлүшү мамлекеттик орган жетекчилери тарабынан начар көзөмөлгө алынууда. Комиссия ишмердүүлүгү алкагында функционалдык милдеттерин сапатсыз аткарган кызматкерлерге карата тартипке чакыруучу чараларды көрүү зарыл», – деп белгиледи Алмамбет Шыкмаматов.

Аталган маселени кароо жыйынтыгы боюнча нормативдик-укуктук актыларын инвентаризациялоо боюнча ишмердүүлүктү активдештирүү, иш-чараларды өз мөөнөтүндө жана кынтыксыз аткаруу иретинде Комиссия мүчөлөрүнүн жоопкерчилигин жогорулатуу боюнча чараларды көрүү, ошондой эле квартал сайын, отчеттук мезгилден кийинки ар-бир айдын 5-күнүнөн калбай, КР Юстиция министрлигине Комиссия аткарылган иш тууралуу маалымат берип туруусу жөнүндө чечим кабыл алынды.

КР Өкмөтүнүн Аппаратынын Маалыматтык камсыздоо бөлүмү