Главная страница | Кыргыз Республикасынын Министрлер Кабинети

Кыргыз Республикасынын Өкмөтүнүн 2004-жылдын 8-июлундагы № 519 «Кыргыз Республикасынын Куралдуу Күчтөрү үчүн запастагы офицерлерди даярдоо жөнүндө» токтомуна өзгөртүүлөрдү жана толуктоолорду киргизүү жөнүндө

Жогорку кесиптик билим берүүнүн билим берүү уюмдарынын студенттерин тандоо жана запастагы офицерлерди даярдоо программасы боюнча аскердик даярдоодон өтүү үчүн аскердик факультеттерге жана кафедраларга киргизүү тартибинин маселелерин жөнгө салуу, ошондой эле Кыргыз Республикасынын «Билим берүү», «Кыргыз Республикасынын жарандарынын жалпыга бирдей аскердик милдети, аскердик жана альтернативдик кызматтар жөнүндө» мыйзамдарына ылайык келтирүү максатында, Кыргыз Республикасынын Өкмөтү токтом кылат:

1. Кыргыз Республикасынын Өкмөтүнүн 2004-жылдын 8-июлундагы № 519 «Кыргыз Республикасынын Куралдуу Күчтөрү үчүн запастагы офицерлерди даярдоо жөнүндө» токтомуна төмөнкү өзгөртүүлөр жана толуктоолор киргизилсин:

- 2-пунктта:

үчүнчү абзацтагы «мамлекеттик жогорку окуу жайлардын» деген сөздөр «жогорку кесиптик билим берүүнүн билим берүү уюмдарынын» деген сөздөр менен алмаштырылсын; төмөнкү мазмундагы төртүнчү абзац менен толукталсын:

«- Запастагы офицерлерди даярдоо программасы боюнча окууга талапкерлерди тандоонун жана алуунун тартиби.»;

Жогоруда аталган токтом менен бекитилген Кыргыз Республикасынын мамлекеттик жогорку окуу жайларынын аскердик факультеттеринде жана кафедраларында запастагы офицерлердин программасы боюнча студенттерди аскердик даярдоо жөнүндө жободо:

- бүткүл текст боюнча түрдүү жөндөмөдөгү «Кыргыз Республикасынын Билим берүү министрлиги», «Кыргыз Республикасынын билим берүү министри», «мамлекеттик жогорку окуу жайлар» деген сөздөр тийиштүү жөндөмөдөгү «билим берүү жана илим маселелерин тескеген ыйгарым укуктуу орган», «билим берүү жана илим маселелерин тескеген ыйгарым укуктуу органдын жетекчиси», «жогорку кесиптик билим берүүнүн билим берүү уюмдары» деген сөздөр менен алмаштырылсын;

- 3-пункт төмөнкү редакцияда баяндалсын:

«3. Аскердик даярдоо мамлекеттик жана расмий тилдерде жүргүзүлөт. Аскердик даярдоо төмөнкүдөй башталат:

- «бакалавриат» программасы боюнча окуп жаткан студенттер үчүн негизги окутуунун 2-курсунан башталат жана аскердик бөлүктөрдө же аскердик факультеттерде жана кафедраларда окуу жыйыны менен аяктайт;

- «адис» программасы боюнча окуп жаткан студенттер үчүн негизги окутуунун 3-курсунан башталат жана аскердик бөлүктөрдө же аскердик факультеттерде жана кафедраларда окуу жыйыны менен аяктайт.»;

- 4-пункт күчүн жоготту деп табылсын.

- 5-пункт төмөнкү мазмундагы абзац менен толукталсын: «Жарандарды аскердик даярдоо, жыйындарды уюштуруу максатында коргоо маселелерин тескеген ыйгарым укуктуу органдарга берилүүчү окуу материалдык-техникалык базаны, техниканы жана башка материалдык каражаттарды пайдалануунун тартиби коргоо маселесин тескеген ыйгарым укуктуу органдын жана жогорку кесиптик билим берүүнүн тийиштүү билим берүү уюмдарынын ортосунда биргелешип иштешүү жөнүндө келишимдер менен аныкталат.»;

- 7-пункт төмөнкү мазмундагы абзац менен толукталсын: «Окуу материалдык-техникалык базаны жаңылоонун, техниканы жана окуу полигондорун тейлөөнүн, ошондой эле чыгымдалган ресурстарды толтуруунун тартиби жана мезгилдүүлүгү коргоо маселесин тескеген ыйгарым укуктуу органдын жана жогорку кесиптик билим берүүнүн тийиштүү билим берүү мекемесинин ортосундагы тиешелүү келишимдер менен аныкталат.».

- 8-пункттун биринчи абзацы жана а) пунктчасы төмөнкү редакцияда баяндалсын:

«8. Коргоо маселелерин тескеген ыйгарым укуктуу органга төмөнкүлөр жүктөлөт: а) окутуучу курамдын окуу жүгүнүн санына студенттердин санын, аскердик факультеттердин жана кафедралардын аудиториялык фондунун мүмкүнчүлүктөрүнө жараша белгилөө, жогорку кесиптик билим берүүнүн билим берүү уюмдарынын студенттери запастагы офицерлердин программасы боюнча даярдоого тийиш болгон аскердик адистиктердин тизмесин аныктоо.»;

- 11-пунктта: экинчи абзацтагы экинчи сүйлөм алып салынсын; төмөнкү мазмундагы үчүнчү абзац менен толукталсын: «Студенттерди аскердик даярдоо жумасына бир жолу 6 сааттык сабактарга, 90 минута өз алдынча даярданууга жана 30 минута студенттер үчүн республикада жана башка өлкөлөрдө коомдук-саясий кырдаал жөнүндө маалыматтарды берүүгө жана машыгууларды өткөрүүгө «Аскердик күн» ыкмасы менен пландалат жана өткөрүлөт. Аскердик факультеттердеги жана кафедралардагы сабактар саат 8.00дө башталып, түшкү тамактануудагы тыныгууну эске алуу менен саат 17.00дө бүтөт, майрам алдындагы күндөрү өз алдынча даярданууну, маалымат берүүнү жана машыгууларды өткөрбөстөн 6 саат сабак болот.»;

- 13-пункттун экинчи абзацынын экинчи сүйлөмү төмөнкү редакцияда баяндалсын: «Аскердик даярдоо боюнча сабактарга негиздүү себептерсиз (студенттин жана/же анын жашы жетелек балдарынын оорусу, жакын тууганынын өлүмү) системалуу түрдө (семестрдин ичинде 3 жолудан көп катары менен же бир жылдын ичинде сабактардын 30 пайызына келбей калуулары бар) келбеген, аскердик жыйындарга катышуудан баш тарткан, ошондой эле аскердик факультеттерде жана кафедраларда окуу процессинде жана окуу жыйындарын өткөрүү мезгилинде окутуучуларга жана жетекчиликке баш ийбей, көрсөтмөлөрүн аткарбай тартип бузган студенттер аскердик факультеттин же кафедранын начальнигинин өтүнүчү боюнча алар студенти болуп эсептелген жогорку кесиптик билим берүүнүн билим берүү уюмунун ректорунун буйругу менен аскердик даярдоо боюнча сабактардан чыгарылат.»;

- 15-пункт төмөнкү редакцияда баяндалсын:

«15. Аскердик факультеттердин, кафедралардын, циклдердин жетектөөчү жана окутуучу курамдарынын кызматтарына анык аскердик кызматта турган, жогорку же жогорку атайын билими жана Куралдуу Күчтөрдө офицердик кызматтарда тийиштүү кызмат өтөө тажрыйбасы бар офицерлер дайындалат. Окутуучу курамдын штаттык кызматтарына запаста турган офицердик курамдын адамдары, аларга анык аскердик кызматты өтөп жаткан офицер-окутуучулар үчүн каралган кызматтар боюнча маяналарды белгилөө менен иштешет. Окутуучу курамдын штаттык кызматтарына запаста турган офицердик курамдын адамдарынын иштөөсү, ошондой эле окутуу-көмөкчү персоналынын штаттык кызматтарын комплектөө аскердик факультеттердин жана кафедралардын башчыларынын сунушу боюнча тийиштүү окуу жайлардын ректорлорунун буйруктары менен жүргүзүлөт. Офицердик курамдын адамдарын анык аскердик кызматтан бошотуу Кыргыз Республикасынын Өкмөтү белгилеген тартипте жүргүзүлөт.».

- 16-пункттун 3-абзацы күчүн жоготту деп табылсын; жогоруда аталган токтом менен бекитилген студенттери запастагы офицерлер программасы боюнча аскердик факультеттеринде жана кафедраларында окууга укугу бар мамлекеттик жогорку окуу жайлардын тизмесинде:

- 1-саптагы «Мамлекеттик жогорку окуу жайдын» деген сөздөр «Жогорку кесиптик билим берүүнүн билим берүү уюмунун» деген сөздөр менен алмаштырылсын;

- 2-пункттагы «Башкаруу» деген сөз «Мамлекеттик башкаруу» деген сөз менен алмаштырылсын;

- 3-пункт «транспорт жана архитектура» деген сөздөрдөн кийин «Н.Исанов атындагы» деген сөздөр менен толукталсын;

- 8-пункттагы «Кыргызстандын эл аралык университетинин окуу-илимий өндүрүштүк комплекси» деген сөздөр «Кыргызстандын эл аралык университети» деген сөздөр менен алмаштырылсын;

- 10-пункт «юридикалык академия» деген сөздөрдөн кийин «Кыргыз Республикасынын Өкмөтүнүн алдындагы» деген сөздөр менен толукталсын;

- 12-пункт «медициналык академия» деген сөздөрдөн кийин «И.Ахунбаев атындагы» деген сөздөр менен толукталсын;

- 16-пункттагы «Ош Кыргыз-Өзбек университети» деген сөздөр «Ош мамлекеттик социалдык университети» деген сөздөргө алмаштырылсын;

- төмөнкү мазмундагы 18-пункт менен толукталсын:

Милициянын генерал-майору Э.Алиев атындагы Кыргыз Республикасынын Ички иштер министрлигинин Академиясы (контракттын негизинде окуу факультети)

Бишкек шаары

».

2. Кыргыз Республикасынын Коргоо министрлиги жана Кыргыз Республикасынын Билим берүү жана илим министрлиги бул токтомду аткаруу боюнча чараларды көрүшсүн.

3. Бул токтомдун аткарылышын контролдоо Кыргыз Республикасынын Өкмөтүнүн Аппаратынын коргоо, укуктук тартип жана өзгөчө кырдаалдар бөлүмүнө жүктөлсүн.

4. Бул токтом расмий жарыяланган күндөн тартып күчүнө кирет.

Премьер-министр Дж.К. Оторбаев

Тиркеме

Запастагы офицерлерди даярдоо программасы боюнча окууга талапкерлерди тандоонун жана алуунун тартиби

1. Жогорку кесиптик билим берүүнүн билим берүү уюмдарынын студенттерин запастагы офицерлердин программасы боюнча аскердик даярдоо (мындан ары - аскердик даярдоо) Студенттери запастагы офицерлер программасы боюнча аскердик факультеттеринде жана кафедраларында окууга укугу бар мамлекеттик жогорку окуу жайлардын тизмеси (мындан ары - Тизме) менен аныкталган жогорку кесиптик билим берүүнүн билим берүү уюмдарынын окуу пландарына өз алдынча окуу сабагы катары киргизилет жана 17-25 жаш курактагы эркек студенттер жана медициналык окуу жайларынын (аскердик-медициналык даярдоо) аял студенттери менен контракттык негизде өткөрүлөт.

2. Тапшырууга талапкерлер катары Тизме менен аныкталган жогорку кесиптик билим берүүнүн билим берүү уюмдарынын студенттери каралат.

3. Аскердик даярдоого өтүү үчүн (киргизүү жана окутуу) Тизме менен аныкталган жогорку кесиптик билим берүүнүн мамлекеттик билим берүү уюмдарынын студенттери белгиленген тартипте кесиптик тандоодон өтүүгө милдеттүү.

4. Аскердик даярдоону окутуу үчүн талапкерлерди кесиптик тандоо төмөнкүлөрдү камтыйт:

1) жыл сайын апрель айынан баштап өтүүчү алдын ала кесиптик тандоо, төмөнкү этаптардан турат:

- талапкер тарабынан аскердик даярдоо каралган жогорку кесиптик билим берүүнүн билим берүү уюмунун негизги окуу жери боюнча аскердик факультетинин деканынын атына (кафедрага) аты-жөнүн жана туулган датасын белгилөө менен эркин формада арыз жазуу;

- жогорку кесиптик билим берүүнүн билим берүү уюмдарынын аскердик даярдоо каралган факультеттеринин декандары (кафедралары) тарабынан тиешелүү талапкерлердин окууга тапшыруу жөнүндө арыздарын кароо, мында декандар төмөнкү учурларда оң чечим кабыл алышат:

а) студенттер Кыргыз Республикасынын жараны болсо;

б) студенттердин тартип бузуулары жок болсо;

в) студенттердин окуу сабактары боюнча карыздарынын жоктугу;

- жогорку кесиптик билим берүүнүн билим берүү уюмдарынын факультеттеринин (кафедраларынын) деканаттарынын окууга сунуш кылынган студенттердин күбөлөндүрүлгөн тизмесин жогорку кесиптик билим берүүнүн билим берүү уюмдарынын ректорлоруна бекитүүгө берүү;

- ректорлор тарабынан берилген тизмелерди жалпылоо жана жыл сайын (10-июлдан кечиктирбестен) аларды аскердик факультеттеринин жана кафедраларынын башчыларына жөнөтүү.

- ден соолугу боюнча талапкерлердин жарактуулугун аныктоо.

Жыл сайын окуу жылдын башында берилген тизмелерге ылайык талапкерлер аскердик факультеттерине жана кафедраларына жөнөтүлүп, ал жерден андан ары биринчи медициналык күбөлөндүрүү үчүн коргоо маселелерин тескеген ыйгарым укуктуу мамлекеттик органдын аскер бейтапканасына жиберилет. Медициналык кызмат көрсөтүүлөргө акы төлөө бекитилген жана белгиленген тартипте макулдашылган баалардын прейскуранттарына ылайык жүргүзүлөт.

Жарактуу деп табылган учурда талапкерлерге аскер кызматына жарактуулугу жөнүндө медициналык маалымкат жана каттоо күбөлүгү тапшырылып, арыздарга тиркелет.

Эгерде талапкер ден соолугунун абалы боюнча жараксыз деп табылса, анда талапкер негизги кесиптик тандоого алынбайт.

2) жыл сайын сентябрда башталуучу талапкерлерди негизги кесиптик тандоо төмөнкү этаптардан турат:

- коргоо маселелерин тескеген ыйгарым укуктуу мамлекеттик органдын ведомстволук актыларына ылайык талапкерлердин дене тарбия даярдыгын текшерүү.

Эгерде талапкер ден соолугунун абалы боюнча дене тарбия даярдыгынын деңгээлине туура келбей жараксыз деп табылса, анда талапкер аскердик факультетине же кафедрасына киргизилбейт;

- жалпы билим берүү сабактары боюнча тест өткөрүү.

Жалпы билим берүү сабактары боюнча тест талапкерлердин жалпы билим берүү даярдыгынын деңгээлин аныктоо максатында өткөрүлөт.

Тестти тапшыруу тартиби (критерийлер, тестирлөө сабактары, өткөрүү жери) коргоо жана билим берүү, илим маселелерин тескеген ыйгарым укуктуу органдардын биргелешкен буйругу менен аныкталат.

Талапкер тесттен өтпөй калган учурда аскердик факультетине же кафедрасына киргизилбейт.

5. Негизги кесиптик тандоо аскердик даярдоо өткөрүлө турган жогорку кесиптик билим берүүнүн билим берүү уюмунун ректорунун буйругу менен түзүлгөн тандоо комиссиясы тарабынан коллегиялуу жүргүзүлөт.

Тандоо комиссиясынын курамына студенттери кесиптик тандоодон өтүүчү жогорку кесиптик билим берүүнүн билим берүү уюмдарынын профессордук-окутуучулук курамынын жана аскердик факультеттеринин жана кафедраларынын окутуучу курамынын өкүлдөрү кирет.

Тандоо комиссиясына төмөнкүлөр жүктөлөт:

- негизги кесиптик тандоонун иш-чараларын өткөрүүнүн шарттарын, убакытын жана жерин аныктоо;

- талапкерлердин дене тарбия даярдыгын текшерүү;

- жалпы билим берүү сабактары боюнча тест өткөрүү.

6. Аскердик даярдоого кабыл алуудан баш тартуу жөнүндө чечим тандоо комиссиясынын жыйынынын протоколу менен таризделет жана андан ары аскердик даярдоо жүргүзүлө турган жогорку кесиптик билим берүүнүн билим берүү уюмунун ректоратына тапшырылат жана тандоо комиссиясынын мүчөлөрүнүн колдору менен күбөлөндүрүлөт.

Аскердик даярдоого кабыл алуудан баш тартуу жөнүндө кабыл алынган чечимдер талапкерлерге деканат аркылуу жеткирилет.

7. Кесиптик тандоону уюштуруу жана өткөрүү маселелери боюнча талапкерлердин даттанууларын жана арыздарын кароо аскердик даярдоо жүргүзүлө турган жогорку кесиптик билим берүүнүн билим берүү уюмунун ректорунун буйругу менен түзүлүүчү аппеляциялык комиссияга жүктөлөт.

Аппеляциялык комиссиянын курамына студенттери кесиптик тандоодон өтүп жаткан жогорку кесиптик билим берүүнүн билим берүү уюмунун кесиптик-окутуучулук курамынын, коргоо, билим берүү жана илим маселелерин тескеген мамлекеттик ыйгарым укуктуу органдардын өкүлдөрү кирет.

Талапкерлердин даттануулары жана арыздары тиешелүү даттануулар жана арыздар алынган учурдан тартып 5 күндүн ичинде аппеляциялык комиссия тарабынан каралат.

Аппеляциялык комиссиянын чечимдери протокол менен таризделет жана аппеляцияга берген талапкерлерге оозеки маалымдалат.

8. Кесиптик тандоону кайталап өтүүгө болбойт.

Ырааттамада белгиленген убакытта жүйөлүү себептерсиз кесиптик тандоого келбей койгон талапкерлер аскердик факультеттерге жана кафедраларга киргизилбейт.

9. Кесиптик тандоодон ийгиликтүү өткөн талапкерлердин тизмеси коргоо маселелерин тескеген ыйгарым укуктуу мамлекеттик органы менен контракт түзүп, аскердик даярдоого киргизүү жөнүндө буйрукка кошуу үчүн студенттер окуган жери боюнча жогорку кесиптик билим берүүнүн билим берүү уюмдарынын ректоратына тапшырылат.

_________________________________________

Тиркемелер

Басып чыгаруу

КР Өкмөтүнүн 2014-жылдын 24-октябрындагы № 617 токтому

Тиркемелер