Кыргыз Республикасынын Өкмөтүнүн 2015-жылдын 10-августундагы № 564 “Кыргыз Республикасында бажылык жөнгө салуу жөнүндө” Кыргыз Республикасынын Мыйзамынын 95 ,101, 102, 105, 128, 135, 148, 153, 157, 158, 163, 176, 180, 213, 229, 232-беренелеринин талаптарын ишке ашыруу боюнча чаралар жөнүндө” токтомуна өзгөртүүлөрдү киргизүү тууралуу

Япониядан ташылып келинген жана дезактивациядан өткөн радиациялык фону жогору болгон автотранспорт каражаттарын бажылык тариздөө максатында, “Кыргыз Республикасынын Өкмөтү жөнүндө” Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:

1. Кыргыз Республикасынын Өкмөтүнүн 2015-жылдын 10-августундагы № 564 “Кыргыз Республикасында бажылык жөнгө салуу жөнүндө” Кыргыз Республикасынын Мыйзамынын 95 ,101, 102, 105, 128, 135, 148, 153, 157, 158, 163, 176, 180, 213, 229, 232-беренелеринин талаптарын ишке ашыруу боюнча чаралар жөнүндө” токтомуна төмөнкүдөй өзгөртүүлөр киргизилсин:

жогоруда аталган токтом менен бекитилген Кыргыз Республикасындагы Евразия экономикалык бирлигинин бажы чек арасы аркылуу жеке жактар тарабынан өздүк пайдалануу үчүн транспорт каражаттарын ташып өткөрүү жөнүндө убактылуу нускамада:

жогоруда аталган Убактылуу нускаманын 2-тиркемеси:

- “22.09.2014-жылдан тартып” жана “01.09.2014-жылдан тартып” деген цифралардан жана сөздөрдөн кийин “***” белгилери менен толукталсын;

- Эскертүүнүн 1-пункту төмөнкүдөй мазмундагы төртүнчү жана бешинчи абзацтар менен толукталсын:

““***” - бул графалар менен белгиленген бажы алымдарынын жана салыктардын бирдиктүү ставкалары Япониядан ташылып келинген, дезактивациядан өткөн радиациялык фону жогору болгон автотранспорт каражаттарына карата радиациялык фондун жогорулабашы жөнүндө кайталап радиациялык текшерүү актысы болгондо колдонулат. Бажы алымдарынын жана салыктардын бирдиктүү ставкасын төлөө бул графага ылайык эсептелген бирдиктүү ставка боюнча ишке ашырылат. Мында бажы алымдарынын жана салыктардын бирдиктүү ставкасын аныктоо максатында чыгарылган учурдан тартып өткөн жылдардын саны мындай автотранспорт каражаттары ташылып келген датага карата эсептелет. Радиациялык фону жогору болгон автотранспорт каражаттарын ташып келүү датасын ырастаган документ болуп темир жол коштомо кагазы эсептелет.

Мисалы: эгерде темир жол коштомо кагазында автотранспорт каражатынын ташылып келинген датасы 01.01.2013-жыл экендиги көрсөтүлсө, ошондой эле мындай автотранспорт каражатынын чыгарылган жылы 2003-жыл болсо, анда бажы алымдарынын жана салыктардын бирдиктүү ставкасын төлөөнү эсептөө максатында чыгарылган учурдан тартып 11 жыл өттү деп саналат жана ставка 1 куб.см үчүн 0,4 долларды түзөт.”.

2. Кыргыз Республикасынын Өкмөтүнө караштуу Мамлекеттик бажы кызматы:

- ушул токтом күчүнө киргенден кийин үч айлык мөөнөттө тиркемеге ылайык дезактивацияланган автотранспорт каражаттарына бажылык тариздөөнү жүргүзсүн;

- жалпыга маалымдоо каражаттарында жана расмий сайтта бажылык тариздөөдөн өткөн дезактивацияланган автотранспорт каражаттарынын тизмесин жарыяласын;

- бажылык тариздөөдөн өткөн дезактивацияланган автотранспорт каражаттарынын тизмесинен маалымат берүүдө кызыкдар жактарга консультациялык жардам көрсөтсүн;

- дезактивацияланган автотранспорт каражаттарынын ээлери тарабынан дезактивацияга жана дезактивацияланган автотранспорт каражаттарын ташууга байланышкан чыгымдардын ордун толтуруу жөнүндө маселени иштеп чыксын.

3. Ушул токтом күчүнө кирген күндөн тартып алты ай колдонула тургандыгы белгиленсин.

4. Ушул токтомдун аткарылышын контролдоо Кыргыз Республикасынын Өкмөтүнүн Аппаратынын финансы жана кредит саясаты бөлүмүнө жүктөлсүн.

5. Ушул токтом расмий жарыяланган күндөн тартып он беш күн өткөндөн кийин күчүнө кирет.

Премьер-министр                                                                     С.Ж.Исаков