Кыргыз Республикасында актуарийлердин ишинин маселелери жөнүндө 

Актуарийлердин ишин жөнгө салуу максатында, “Кыргыз Республикасында камсыздандырууну уюштуруу жөнүндө” Кыргыз Республикасынын Мыйзамына, “Кыргыз Республикасынын Өкмөтү жөнүндө” Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:

   1. Кыргыз Республикасында актуардык иш жөнүндө жобо тиркемеге ылайык бекитилсин.

    2. Кыргыз Республикасынын Өкмөтүнүн 2016-жылдын 12-декабрындагы № 661 “Банктык эмес финансылык сектор жаатында иштин айрым түрлөрүн лицензиялоо жөнүндө убактылуу жобону бекитүү тууралуу” токтомуна төмөнкүдөй толуктоолор киргизилсин:

жогоруда аталган токтом менен бекитилген Банктык эмес финансылык сектор жаатында иштин айрым түрлөрүн лицензиялоо жөнүндө убактылуу жободо:

- 2-пункт төмөнкүдөй мазмундагы он тогузунчу абзац менен толукталсын:

“- актуардык ишке.”;

- төмөнкүдөй мазмундагы 9¹-глава менен толукталсын:

“9¹ . Актуардык ишти лицензиялоонун өзгөчөлүктөрү

34¹. Актуардык ишке берилүүчү лицензия мөөнөтсүз болуп эсептелет жана Кыргыз Республикасынын бардык аймактарында колдонулат.

34² Лицензияланган актуардык иш актуардык ишти жүзөгө ашыруу боюнча жумушту аткаруудан жана (же) кызмат көрсөтүүдөн турат.

34³. Актуардык ишти жүргүзүүгө лицензияны алуу үчүн төмөнкү документтер берилүүгө тийиш:

- белгиленген формадагы арыз;

- жеке ишкер үчүн мамлекеттик каттоо жөнүндө күбөлүктүн көчүрмөсү;

- арызды кароо жана лицензияны берүү үчүн лицензиялык жыйымды төлөгөндүгүн ырастаган  документтин көчүрмөсү;

- нотариус аркылуу күбөлөндүрүлгөн жогорку экономикалык, математикалык же техникалык билиминин болушун ырастаган документтердин көчүрмөлөрү (тиркөө менен);

- соттолуунун жоктугу жөнүндө маалымкат.”.

     3. Ушул токтом расмий жарыяланган күндөн тартып он беш күн өткөндөн кийин күчүнө кирет.

Премьер-министр                                                                       С.Ш.Жээнбеков