Кыргыз Республикасында үрөнчүлүктү өнүктүрүүнү мамлекеттик колдоо чаралары жөнүндө
Айылдык товар өндүрүүчүлөрдү жогорку сапаттуу сертификацияланган үрөн жана көчөт материалдары менен камсыз кылуу максатында, «Кыргыз Республикасынын Өкмөтү жөнүндө» Кыргыз Республикасынын конституциялык Мыйзамынын 10 жана 17-беренелерине, Кыргыз Республикасынын Жер кодексинин 7-беренесинин 4-пунктуна ылайык Кыргыз Республикасынын Өкмөтү токтом кылат:
1. Кыргыз Республикасынын үрөнчүлүк чарбаларына мамлекеттик дотация берүү тартиби жөнүндө жобо 1-тиркемеге ылайык бекитилсин.
2. Кыргыз Республикасынын Финансы министрлиги 2018-2022-жылдарга республикалык бюджетти түзүүдө мамлекеттик дотация төлөө системасын киргизүүнү караган ченемдик укуктук акт бекитилгенден кийин республиканын үрөнчүлүк чарбаларына мамлекеттик дотация төлөөгө каражат караштырсын:
- 2-тиркемеге ылайык 2018-2022-жылдар мезгилинде себүү максатында дыйкандарга жана фермерлерге сатуу үчүн экинчи репродукциядагы күздүк жана жаздык буудайдын үрөнүн республиканын үрөнчүлүк чарбаларынын өндүрүү көлөмүнө жараша;
- 3-тиркемеге ылайык 2018-2022-жылдар мезгилинде республиканын үрөнчүлүк чарбаларында сорт жаңыртуу жана сорт алмаштыруу үчүн буудайдын, арпанын жана беденин суперэлита жана элита үрөнүн өндүрүү жана сатуу көлөмүнө жараша.
3. Жергиликтүү өз алдынча башкаруу органдарына төмөнкүлөр сунушталсын:
- үрөнчүлүк чарбаларын жүргүзүү үчүн жерлерди ижарага берүү мөөнөтүн 20 жылга чейин узартуу;
- 4-тиркемеге ылайык 2018-2022-жылдар мезгилине үрөн жана көчөт материалдарын өндүрүүнү көбөйтүү үчүн республиканын үрөнчүлүк чарбаларына кошумча сугат айдоо жерлерин бөлүп берүү жөнүндө маселени белгиленген тартипте кароо.
4. Кыргыз Республикасынын Өкмөтүнүн 2008-жылдын 30-декабрындагы № 735 «Кыргыз Республикасынын Салык кодексинин 98, 242, 255, 257, 258, 280, 281, 287, 295-беренелеринин жана «Кыргыз Республикасынын Салык кодексин кодонууга киргизүү жөнүндө» Кыргыз Республикасынын Мыйзамынын 11-беренесинин талаптарын ишке ашыруу тууралуу» токтомуна төмөнкүдөй толуктоо киргизилсин:
- жогоруда аталган токтом менен бекитилген Үрөн материалдарынын тизмеси төмөнкүдөй позициялар менен толукталсын:
«
| Жашылча өсүмдүктөрү (себүү үчүн үрөн): |
| 1209 91 900 0 | Томаттар |
| 1209 91 900 0 | Ачуу калемпир |
| 1209 91 900 0 | Таттуу калемпир |
| 1209 91 900 0 | Бадыраң |
| 1209 91 900 0 | Ак баштуу капуста |
| 1209 91 900 0 | Пияз |
| 1209 91 900 0 | Сабиз |
| 1209 91 300 0 | Аш кызылчасы |
| 1209 91 900 0 | Шалгам |
| 1209 91 900 0 | Баклажан |
| 0710 40 000 0 | Кант жүгөрү |
| Бакча өсүмдүктөрү (себүү үчүн үрөн) |
| 1209 99 990 0 | Дарбыз |
| 1209 99 990 0 | Коон |
| 1207 99 970 0 | Ашкабак |
Май өсүмдүктөрү (себүү үчүн үрөн): | |
| 1205 10 900 0 | Рапс |
Уруктуу мөмө берүүчү жыгач өсүмдүктөр (отургузуу үчүн калемчелер, көчөттөр): | |
| 0602 20 900 0 | Алма багы |
| 0602 20 900 0 | Алмурут |
Данектүү мөмө берүүчү жыгач өсүмдүктөр (отургузуу үчүн калемчелер, көчөттөр): | |
| 0602 20 900 0 | Кара өрүк |
| 0602 20 900 0 | Алча |
| 0602 20 900 0 | Чие |
| 0602 20 900 0 | Шабдаалы |
| 0602 20 900 0 | Өрүк |
| 0602 20 900 0 | Гилас |
Жемиштер (отургузуу үчүн калемчелер, көчөттөр): | |
| 0602 20 900 0 | Кожогат |
| 0602 20 900 0 | Карагат |
| 0602 20 900 0 | Дан куурай |
| 0602 20 900 0 | Жүзүм |
Жаңгак мөмөлүүлөр (отургузуу үчүн калемчелер, көчөттөр): | |
| 0602 20 900 0 | Жаңгак |
| 0602 20 900 0 | Мисте |
Тоют азык тамырдуулар (себүү үчүн үрөн): | |
| 1209 29 600 0 | Тоют кызылчасы |
Тоют чанактуулар (себүү үчүн үрөн): | |
| 1214 90 900 0 | Эспарцет |
».
5. Кыргыз Республикасынын Өкмөтүнүн облустардагы ыйгарым укуктуу өкүлдөрү, жергиликтүү мамлекеттик администрация башчылары жергиликтүү өз алдынча башкаруу органдары менен макулдашуу боюнча 2018-2019-жылдар мезгилине тамчылатып сугаруу системасын колдонуу менен мөмө-жемиш өсүмдүктөрүнүн көчөт материалын, анын ичинде ыңгайсыз жана пайдаланылбай жаткан жерлерде өстүрүү максатында мөмө питомнигин түзүү боюнча иш-чаралар планын даярдашсын жана беришсин.
6. Ушул токтом расмий жарыяланган күндөн тартып он күн өткөндөн кийин күчүнө кирет.
7. Ушул токтомдун аткарылышын контролдоо Кыргыз Республикасынын Өкмөтүнүн Аппаратынын агроөнөр жай комплекси жана экология бөлүмүнө жүктөлсүн.
Премьер-министр С.Ш.Жээнбеков