Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасынын Министрлер Кабинетинин кезектеги кеңешмесин өткөрүп, анда 14 маселе каралды.

Тактап айтканда, салык карыздарын өндүрүү тартиби жана кыйыр ыкмалардын негизинде салыктык милдеттенмелерди аныктоонун методологиясы бекитилди.

Министрлер Кабинетинин чечимине ылайык, 2022-жылдын 1-апрелинен 31-декабрына чейин Кыргыз Республикасына импорттолуучу кумшекердин жана рафинаддалган өсүмдүк майынын кошумча наркына нөлдүк салык ставкасы белгиленген.

Белгилей кетсек, бир катар ченемдик-укуктук актылардын долбоорлору толуктап иштеп чыгууга жөнөтүлгөн

Министрлер Кабинетинин Төрагасы мамлекеттик органдар тарабынан ченемдик укуктук актылардын долбоорлорунун даярдалышын сынга алып, бардык долбоорлор тыкыр укуктук жана экономикалык экспертизадан өтүшү керектигин белгиледи.

«Толук иштелип чыкпаган, чийки чечим долбоорлорун киргизүүгө жол берилбейт. Министрлер Кабинетинин ар бир мүчөсү киргизилген долбоор үчүн жооп берет. Бул эсиңиздерде болсун. Чечимдин долбоору деталдуу жана такталган эсептөөлөр менен бекемделүүгө тийиш, бул өзгөчө билим берүү мекемелеринин курулушуна тийиштүү», - деп жыйынтыктады Акылбек Жапаров.