Кыргыз Республикасынын Министрлер Кабинетинин Төрагасы-Президенттин Администрациясынын Жетекчиси Акылбек Жапаров Исламабад шаарындагы (Пакистан) жумуш сапарынын алкагында Пакистан Ислам Республикасынын Президенти Асиф Али Зардари менен жолугушту.

Анда МинКаб башчысы Акылбек Жапаров Пакистан Кыргызстандын тышкы саясатында артыкчылыктуу орундардын бирин ээлей турганын өзгөчө белгилеп:

 "Биз сиздердин өлкө менен соода-экономикалык, инвестициялык, маданий-гуманитардык жана илимий-техникалык кызматташтыкты өнүктүрүүгө абдан кызыкдарбыз"-деди.

Ошондой эле Акылбек Жапаров Кыргыз Республикасы менен Пакистан Ислам Республикасы БУУ, Шанхай Кызматташтык Уюму, Ислам Кызматташтык Уюму, Экономикалык Кызматташтык Уюму ж.б.  эл аралык уюмдардын алкагында бири-бири менен активдүү кызматташаарын белгиледи. 

Жолугушууда тараптар  соода-экономикалык кызматташтыктагы маселелерди кеңири талкуулашып, инвестиция, энергетика, транспорт жана маданий-гуманитардык кызматташтыкты мындан ары өнүктүрүү боюнча пикир алмашышты.