Кыргыз Республикасы 2026-жылы өтө турган VI Дүйнөлүк көчмөндөр оюндарына активдүү даярдыкты баштады. Бул тууралуу бүгүн өткөн маалымат жыйынында Кыргыз Республикасынын Министрлер Кабинетинин Төрагасынын орун басары, Көчмөндөр оюндарынын уюштуруу комитетинин төрагасы Эдил Байсалов билдирди.

Эдил Байсалов Кыргыз Республикасы үчүн кийинки жыл маанилүү окуяларга жана иш-чараларга бай болорун белгиледи. "Кыргыз Республикасы өлкөнүн эгемендүүлүгүнүн 35 жылдыгын белгилейт, Шанхай кызматташтык уюмуна төрагалык кылып, иш-чаралардын жана мамлекет башчыларынын жана өкмөттөрдүн саммитинин интенсивдүү программасын кабыл алат. 

Кийинки жылдын жайына юбилейлик Ысык-Көл форумун өткөрүү пландаштырылган, ага алдыңкы интеллектуалдар жана мамлекеттик ишмерлер, дүйнөгө белгилүү жазуучулар жана окумуштуулар чакырылган", - деди ал. 

Министрлер Кабинетинин Төрагасынын орун басары VI Дүйнөлүк көчмөндөр оюндарын өткөрүү аларды сапаттык жактан жаңы деңгээлге чыгарып, жалпы улуттук майрам гана эмес, Кыргызстан үчүн гана эмес, эл аралык календарда да маанилүү окуя болушу керектигин баса белгиледи. Анын айтымында, Оюндар этноспортту популяризациялоо, салттуу маданиятты сактоо жана элдердин ортосундагы маданий-гуманитардык байланыштарды чыңдоо үчүн уникалдуу эл аралык аянтчага айланды.

«Биз Оюндарга өзгөчө көңүл буруу менен даярданып жатабыз. Кийинки жылы эле илимий-маданий жана спорттук иш-чараларга бай программа күтүп турат. Бул этникалык спорттун түрлөрүн, элдик искусствону жана көчмөн цивилизациялардын тарыхый мурастарын жайылтууга багытталган масштабдуу цикл болот. Учурда Оюндарга катышуу үчүн 100гө жакын өлкөгө чакыруулар жөнөтүлдү», - деди Министрлер Кабинетинин Төрагасынын орун басары жана бүгүнкү күндө инфраструктураны активдүү даярдоо, өнөктөштөр жана эл аралык уюмдар менен координация жүргүзүлүп жатканын кошумчалады. Эдил Байсалов Дүйнөлүк көчмөндөр оюндары жогорку деңгээлде өтүп, маданияттын, спорттун жана рухтун биримдигинин майрамына айланарына ишенимин билдирди.