Бишкек, Ынтымак Ордо, 2025-жылдын 19-августу – Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиевдин төрагалыгы алдында мамлекеттик системаны бюрократиядан арылтуу боюнча реформаларды ишке ашырууга арналган Ведомстволор аралык комиссиянын отуруму болуп өттү. Отурумда мамлекеттик башкарууну оптималдаштырууга жана мамлекеттик аппараттын натыйжалуулугун жогорулатууга багытталган иш-чаралардын төртүнчү пакетин сунуштоого жана кеңири талкуулоого басым жасалды.

Реформалардын жаңы пакети билим берүү, маданият жана илимден археологияга, мамлекеттик кызматка, медицинага жана санариптештирүүгө чейинки кеңири чөйрөнү камтыйт. Анын максаты – административдик жол-жоболорду кыйла жөнөкөйлөштүрүү, мамлекеттик органдардын ишинин ачыктыгын жана натыйжалуулугун жогорулатуу, жарандарга жана бизнес-коомчулукка жүктү азайтуу.

Негизги баяндаманы Юстиция министри, Министрлер Кабинетинин Төрагасынын орун басары, Улуттук стратегиялык демилгелер институтунун директору Аяз Баетов жасады. Анда ал, төртүнчү пакеттин артыкчылыктуу милдети жарандар менен мамлекеттин ортосундагы өз ара аракеттенүү үчүн эң ыңгайлуу шарттарды түзүү, ашыкча административдик тоскоолдуктарды жоюу экенин белгиледи.

“Биздин милдет – жарандар өздөрүнө керектүү мамлекеттик кызматтарды тез, натыйжалуу жана ашыкча чыгымдарсыз алуусу үчүн бюрократиялык тоскоолдуктарды азайтуу”, - деп белгиледи Аяз Баетов. Анын айтымында, ири масштабдуу бюрократиядан арылуу процессинин алкагында буга чейин 27 ченемдик укуктук акт (ЧУА) кабыл алынган, мындан тышкары 3 ЧУАга Президенттин кол коюусу күтүлүүдө, 13 ЧУА Жогорку Кеңештин кароосунда, 11 ЧУАнын долбоорун Президенттин Администрациясы даярдоодо, 9 ЧУА коомдук талкуудан өткөн. Жалпысынан алганда 100дөн ашык ченемдик укуктук актылар жөнүндө сөз болуп жатат.

Чаралардын төртүнчү пакетине кирген негизги сунуштардын арасында:

• Мамлекеттик кызматтарды көрсөтүүдө “бирдиктүү терезе” принцибин кеңири жайылтуу, бир жерде комплекстүү кызматтарды камсыздоо.
• Мамлекеттик процесстерди тездетилген санариптештирүү жана кызматтардын максималдуу мүмкүн болгон санын онлайн форматка өткөрүү, ведомстволорго жеке баруу зарылдыгын жокко чыгаруу.
• Арыздарды кароо жана уруксат берүү үчүн талап кылынган убакыттын олуттуу кыскарышы, так жана ачык процедураларды белгилөө.
• Статистикалык маалыматтарды жыйноо жана иштеп чыгуу процесстерин толук масштабдуу автоматташтыруу, маалыматтын ишенимдүүлүгүн жана актуалдуулугун жогорулатуу.
• Мамлекеттик кызматкерлерди бошотуу жана ишке алуу жол-жоболорун жөнөкөйлөтүү.
• Мамлекеттик кызматкерлер үчүн санариптик көндүмдөрдүн милдеттүү талабын киргизүү.

Жыйындын жүрүшүндө мамлекеттик органдардын жетекчилери бюрократиядан арылуу стратегиясын ишке ашыруунун алкагында мурда коюлган милдеттердин аткарылышы тууралуу кеңири баяндамаларды беришти. Жетишилген натыйжалар, аныкталган көйгөйлүү маселелер талкууланып, аларды чечүүнүн конкреттүү жолдору сунушталды.

Ошондой эле, үнөмдөлгөн каражаттарды башкаруу маселесине да көңүл бурулду. Юстиция министри Аяз Баетовдун айтымында, министрликтер менен ведомстволор мамлекеттик түзүлүштү бюрократиядан арылтуунун алкагында үнөмдөлгөн каражаттарды өз алдынча пайдалана алышат, маселен, штатты кыскартуудан, процедураларды же чыгашаларды оптималдаштыруудан үнөмдөлгөн каражаттар. 

Адылбек Касымалиев талкууну жыйынтыктап жатып, бюрократиядан арылуу реформасын ырааттуу ишке ашыруунун маанилүүлүгүн жана бардык деңгээлдеги бул процесске бардык мамлекеттик органдардын активдүү катышуусунун зарылдыгын белгиледи. Ал белгилегендей, биргелешкен күч-аракеттер менен гана мамлекеттик башкаруунун заманбап жана натыйжалуу системасын түзүүдө олуттуу прогресске жетишүүгө болот.

"Биз эл үчүн иштей турган мамлекеттик системаны түзүшүбүз керек. Бул биздин негизги милдетибиз. Көп иштер жасалды, эң негизгиси бул өзгөрүүлөрдү жарандарыбыз жеринде көрүшү керек", - деп жыйынтыктады МинКаб Төрагасы Адылбек Касымалиев.

Отурумдун жыйынтыгында мамлекеттик түзүлүштү бюрократиядан арылтуу боюнча иш-чаралардын төртүнчү пакетин ишке ашыруунун далилдүү кадамдарын, жооптуу адамдарды жана мөөнөттөрүн аныктоочу протокол кабыл алынды.