Кыргыз Республикасынын Президентинин Администрациясынын Жетекчиси – Министрлер Кабинетинин Төрагасы Адылбек Касымалиевдин атына чет өлкөлөрдүн өкмөт башчыларынан Кыргыз Республикасынын Эгемендүүлүк күнүнө карата куттуктоолор келип түштү.

Азербайжан Республикасынын Премьер-министри Али Асадов Министрлер кабинетинин башчысына куттуктоо жолдоду.

«Азербайжан менен Кыргызстанды терең тарыхый, маданий жана руханий тамырлар, салттуу тыгыз достук, өз ара түшүнүшүү жана кызматташтык мамилелери байланыштырат. Мамлекет башчыларыбыздын аракетинин аркасында азербайжан-кыргыз өз ара мамилелери стратегиялык өнөктөштүк деңгээлине чыкканы кубандырат. Бул активдүү саясий диалог, интенсивдүү байланыштар жана эки тараптуу жана көп тараптуу форматтарда өз ара пайдалуу кызматташтык менен мүнөздөлөт. Биздин биргелешкен аракеттерибиз мындан ары да Азербайжан менен Кыргызстандын ортосундагы көп пландуу өз ара аракеттенүүнү кеңейтүүгө, өлкөлөрүбүздүн боордош элдеринин жыргалчылыгы үчүн ар кандай тармактарда өз ара пайдалуу демилгелерди натыйжалуу ишке ашырууга өбөлгө түзөт деп ишенем. Ушул маанилүү күнү Сизге, урматтуу Адылбек Алешович, чың ден соолук, жооптуу ишиңизге ийгиликтерди, ал эми боордош кыргыз элине бакубатчылык жана гүлдөп өнүгүүнү каалайм», - деп айтылат куттуктоодо.

Алжир Элдик Демократиялык Республикасынын Премьер-министри Назир Ларбави Министрлер кабинетинин башчысын республиканын Көз карандысыздык күнү менен куттуктады.

«Сизди өлкөңүздүн Көз карандысыздык күнү менен куттуктайм жана сизге чын жүрөктөн чың ден соолук жана бакубатчылык каалайм. Ошондой эле достук мамиледеги кыргыз элине өнүгүү жана гүлдөп өсүүнү каалайм. Учурдан пайдаланып, биздин өлкөлөрдүн ортосундагы кызматташтыкты чыңдоо үчүн сиз менен биргелешип иштөөгө даяр экенимди ырастагым келет», - деп айтылат куттуктоодо.

Босния жана Герцеговинанын Министрлер Кеңешинин Төрайымы Боряна Кришто Министрлер Кабинетинин Төрагасын майрамы менен куттуктады.

 «Босния жана Герцеговинанын Министрлер Кеңешинин атынан жана өзүмдүн атымдан Сизди жана Кыргыз Республикасынын элин Эгемендүүлүк күнү менен куттуктайм», - деп айтылат куттуктоо катында.

Беларусь Республикасынын Премьер-министри Александр Турчин Министрлер Кабинетинин Төрагасы Адылбек Касымалиевди улуттук майрамы менен куттуктады.

 «Беларусь менен Кыргызстандын ортосундагы мамилелер жогорку деңгээлдеги ишенимге ээ экенин белгилей кетүүгө кубанычтамын. Бул ишеним ишкердик байланыштарды чыңдоого, эки тараптуу сооданы жана кооперациялык кызматташтыкты кеңейтүүгө, мамлекеттерибиздин илимий-технологиялык потенциалын биргелешип пайдаланууга ишенимдүү негиз түзөт. Сизге, урматтуу Адылбек Алешович, чың ден соолук, ошондой эле бардык пландарды жана демилгелерди ийгиликтүү ишке ашыруу үчүн түгөнгүс күч-кубат каалайм», - деп айтылат куттуктоо телеграммасында.

Иран Ислам Республикасынын биринчи вице-президенти Мохаммад Реза Ареф Министрлер Кабинетинин башчысын жана Кыргызстан элин майрамы менен куттуктады.

«Дос жана боордош Кыргыз Республикасынын Эгемендүүлүк күнүнүн урматына чын жүрөктөн куттуктоо жолдойм. Эки өлкөнүн аракеттеринин аркасында биздин ортобуздагы мамилелер мындан ары да кеңейет, ал эми эки тараптуу жана аймактык кызматташтыкты өнүктүрүү эки тараптуу мамилелердин күн тартибине кирет деп ишенем. Сизге жана Кыргыз Республикасынын элине ден соолук, ийгилик, бакыт жана бакубатчылык каалайм», - деп айтылат телеграммада.

Казакстан Республикасынын Премьер-министри Олжас Бектенов өлкөнүн Эгемендүүлүк күнүнө карата куттуктоо жолдоду.

«Бул маанилүү күн Кыргызстан элинин улуттук биримдикке жана ынтымакка умтулуусун, жаратмандык рухун жана патриоттук сезимин символдоштурат. Азыркы доордо Кыргыз мамлекети социалдык-экономикалык өнүгүүнү камсыз кылууда, эл аралык кадыр-баркын чыңдоодо жана элдин бакубаттуулугун жакшыртууда олуттуу натыйжаларга жетишти. Казакстан боордош Кыргызстан менен достук жана коңшулук мамилелерди чыңдоого чоң маани берет. Эки өлкөнүн өкмөттөрүнүн ортосундагы жемиштүү өз ара аракеттенүү мындан ары да биздин элдердин жыргалчылыгы үчүн бардык багыттар боюнча эки тараптуу кызматташтыкты өнүктүрүүгө өбөлгө түзөт деп ишенем. Сизге чың ден соолук, мамлекеттик ишмердүүлүгүңүзгө ийгиликтерди, ал эми боордош элге бакубатчылык каалайм».

Россия Федерациясынын Өкмөтүнүн Төрагасы Михаил Мишустин Министрлер Кабинетинин Төрагасы Адылбек Касымалиевди улуттук майрам менен куттуктады.
«Россия менен Кыргыз Республикасын достук, өнөктөштүк жана союздаштык мамилелер байланыштырат. Жогорку деңгээлде жетишилген макулдашууларды ишке ашыруунун алкагында соода-экономикалык жана инвестициялык кызматташтык өнүгүп, энергетика, өнөр жай, илим жана маданият тармактарында ири биргелешкен долбоорлор ишке ашырылууда. Көз карандысыз Мамлекеттер Шериктештигинде, Евразия экономикалык биримдигинде жана башка көп тараптуу форматтарда өз ара аракеттенүү күчөтүлүүдө. Өкмөттүк линия боюнча активдүү иш мындан ары да практикалык кызматташтыкты кеңейтүүгө, өз ара пайдалуу жаңы демилгелерди илгерилетүүгө көмөктөшөт деп ишенем. Бул Россия Федерациясынын жана Кыргыз Республикасынын кызыкчылыктарына толук жооп берет. Сизге, урматтуу Адылбек Алешович, чың ден соолук, бакубатчылык жана жооптуу ишиңизге ийгиликтерди, ал эми Кыргызстандын бардык жарандарына бакыт жана гүлдөп өнүгүүнү каалайм», - деп айтылат куттуктоо катында.

Түркия Республикасынын вице-президенти Жевдет Йылмаз Министрлер Кабинетинин Төрагасын жана Кыргызстан элин майрамы менен куттуктады.

 «Тилдин окшоштугуна, ишенимге жана маданий байланыштарга негизделген стратегиялык мамилелерибиз жана кызматташтыгыбыз мындан ары да эки тараптын кызыкчылыгы үчүн чыңдалып, өнүгөт деп ишенем. Сизге чың ден соолук жана бакыт, ал эми кыргыз элине бакубатчылык, гүлдөп өнүгүү жана туруктуу өнүгүү каалайм», - деп айтылат куттуктоо катында.

Өзбекстан Республикасынын Премьер-министри Абдулла Арипов боордош Кыргызстан элине тынчтык жана мындан аркы гүлдөп өнүгүү каалоосу менен куттуктоо жолдогон.

«Акыркы жылдары Кыргыз Республикасы динамикалуу өнүгүп, бардык тармактарда маанилүү долбоорлор ишке ашырылып, калктын бакубаттуулугуна кызмат кылган жогорку көрсөткүчтөргө жетишилүүдө. Өзбекстан Республикасынын Президенти Шавкат Миромонович Мирзиёев жана Кыргыз Республикасынын Президенти Садыр Нургожоевич Жапаров боордош элдерибиздин достук жана коңшулук мамилелеринин мындан ары динамикалуу өнүгүшүнө, мамлекеттерибиздин ортосундагы көп пландуу кызматташтыкка жана стратегиялык өнөктөштүккө бекем негиз салганын өзгөчө белгилегим келет. Биргелешкен аракеттерибиз менен мамлекет башчыларыбыз тарабынан өз ара пайдалуу кызматташтыкты мындан ары да чыңдоо боюнча коюлган милдеттердин өз убагында жана сөзсүз түрдө аткарылышын камсыздайбыз деп ишенем», - деп айтылат куттуктоодо.