Кыргыз Республикасынын Министрлер Кабинетинин Төрагасы — Президенттин Администрациясынын Жетекчиси Адылбек Касымалиев Бишкек шаарынын Ала-Тоо аянтында, Кыргыз Республикасынын эгемендүүлүгүнүн 34 жылдыгына арналган салтанатка катышып, куттуктоо сөзүн сүйлөдү. 

Куттуктоо сөзүнүн текстти: 

Кутмандуу кечиңиздер менен урматтуу мекендештерим!

Ардактуу меймандар! Бишкек шаарынын тургундары!

Эгемендүүлүк! Көз карандысыздык! Эркиндик! – бул элибиздин таалайына бүткөн энчиси, улуу дөөлөтү!

Ушул күнү – улутубузду, салтыбызды, маданиятыбызды, элибизди сактап,

кылычтын мизи менен,

найзанын учу менен,

акылмандын кыраакы сөзү менен,

көрө билген көсөмдөрдүн көзү менен,

баатырлардын күч-кубаты, кайраты менен тарыхта тагдыр талашып кылымдарды карыткан ата-бабаларыбызга – таазим кылабыз!

Ушул күнү – соңку жаңы тарыхта улуттун боштондугу үчүн күрөшкөн, дүйнөлүк согушта Ата Мекен үчүн жан аябай кан кечип Берлинге Жеңиш туусун сайган ата-бабаларыбызга, оорукта түмөн түйшүк тартып уулдарын күткөн энелерге таазим кылабыз!

Ушул күнү – элибиздин руханий дүйнөсүн байытып, “Манас” баштаган эпосторду муундан муунга сактап келген манасчыларга, “Камбаркан” баштаган комуз күүлөрү менен элибизди коштоп келген комузчуларга, дайрадай толкуп төккөн акындарга таазим кылабыз.

Ушул күнү – улуу держава Советтер Союзунун элдери менен бирдикте экономикалык керемет жаратып, дүйнө жүзү боюнча эң сабаттуу элге айланып, космоско кол сунуп, суу жетпеген жерлерге суу жеткирип, жүздөгөн ишканаларды, ондогон ГЭСтерди, миңдеген мектептерди, миллиондогон турак жайларды куруп, эркиндик, теңдик ураандары менен дүйнөгө үлгү көрсөткөн аталарга, энелерге, эжелерге, агаларга таазим кылабыз!

Баарыңыздарды, Ала-Тоону жердеген көп улуттуу элибизди – Кыргыз Республикасынын Президенти урматтуу Жапаров Садыр Нургожоевичтин жана Министрлер Кабинетинин атынан ушул улуу майрам, улуу күн – көз карандысыз, суверендүү, эгемен, эркин мамлекетибиздин күнү менен  чын жүрөктөн куттуктайм!

Кадырлуу замандаштар!

Биздин азыркы муундун ыйык милдети – ата-бабалардын жолун улантып, келечекке карай кеткен чексиз жолдо жеңиштерине жетип, алтын кызыл тууну желбиретип, убакыт менен тең жарышып, заманга татыктуу – өнүккөн Кыргызстанды куруу!

Азыркы заман бизге өзгөчө талаптарды коюуда. Азыркы доор –маалыматтын доору, азыркы доор – технотрон доор, сандар дүйнөнү башкарган санариптүү доор. Илимдүү, билимдүү элдер алдыга озгон, дүйнөнүн тагдырын чечип жаткан доор. Дүйнөлүк тартипте, мамлекеттик түзүлүштө, ошондой эле үй-бүлөлүк мамилелерде, адамдардын руханий дүйнөсүндө тектоникалык өзгөрүүлөр болуп жаткан мезгил.

Ушул мезгилдин талабына жооп берүүгө, кадырлуу замандаштар, сиздер – даярсыздар! Кыргызстандын – эли даяр!

Тынчтык! Береке! Байлык! Ырыс алды – ынтымак! – элибиздин ыйык тилеги!

Жылдыз кармап, булутка жүз чайыган,

Кең Ала-Тоо, Ысык-Көлдө турагы.

Күрөш менен өмүр жолу уланган

Манас! Манас! Манас баатыр урааны!

Жашай бер, өркүндөп өсө бергин, Мекеним Кыргызстан!