Автоматташтырылган системаны жана посттордогу текшерүүчү комплекстерди бириктирген аналитикалык платформаны түзүү санариптештирүүнүн жана фискалдаштыруунун кийинки кадамы болот. Бул тууралуу Кыргыз Республикасынын Премьер-министри Мухаммедкалый Абылгазиев Санариптештирилген командалык борбордо өткөн жыйында билдирди. 

Иш-чарада салыктык фискалдаштыруу жана бажы жол-жоболорун санариптештирүү маселелери талкууланды. 

«Жогоруда айтылгандар Өкмөттүн ишмердүүлүнүн артыкчылыктуу багыттары болуп саналат. Салыктык фискалдаштыруу жана бажы жол-жоболорун санариптештирүү маселелери санариптештирүү саясатынын алкагындагы маанилүү милдеттерден.  Бул багыттагы жумуштар мамлекеттик бюджеттин кирешесин бир кыйла көбөйтүү, көмүскө экономиканын үлүшүн азайтуу, аткезчилик аркылуу кирген товарларды кыскартуу менен көзөмөлдөөнүн ачык-айкын  механизмин киргизүүгө мүмкүнчүлүк түзөт», - деди Премьер-министр.

Мухаммедкалый Абылгазиев салыктык фискалдаштыруунун алкагында 

патент электрондук формада берилүүдө, электрондук салык отчетун берүү системалары иштеп жатат, электрондук эсеп-фактураларын колдонуу боюнча пилоттук долбоору уланууда, ал эми 2020-жылдын 1-июлунан тартып алкоголдук жана тамеки продукцияларына санариптик маркировканы милдеттүү түрдө колдонуу киргизилип жатканын белгиледи. 

«Ак-Тилек», «Чалдовар», «Чоң-Капка» көзөмөл-өткөрүү пункттарында автоматташтырылган салмак-габариттик көзөмолдөө системасы орнотулду. Мындан тышкары бажы жол-жоболорун санариптештирүүнүн алкагында  9 постко 472 видеокамера, 5 өткөрүү пунктуна инспекциялык-кароо комплекстери орнотулду. Аткарыла турган кийинки кадам, бажы жол-жоболорун санариптештирүүнун алкагында бардык системаларды жана комплекстерди бириктирүүчү аналитикалык платформаны түзүү болуп саналат. Бул аналитикалык система бажыдагы мамлекеттик көзөмөлдү күчөтүүгө шарт түзөт жана бажы жол-жоболорунун ачыктыгын камсыз кылат», - деди Өкмөт башчы. 

Жыйындын соңунда тармактык мамлекеттик органдарга 2020-жылы ишке бериле турган салык жол-жоболорун фискалдаштыруунун алкагындагы системаны сапаттуу жүзөгө ашырууну камсыз кылуу, бажы жол-жоболорун санариптештирүү боюнча мекемелик жумуш топ түзүү, жүктү бажы постунан убактылуу сактоочу кампага чейин жеткирүүдө жүк ташуучу транспорт каражаттарын мониторинг кылуу боюнча аналитикалык системаны иштетүү тапшырмасы берилди.