Сиздерди кесиптик майрамыңыздар менен чын жүрөктөн куттуктаймын! Жоопкерчиликти жана кажыбас кайратты талап кылган татаал жана коомубуз үчүн өтө маанилүү ишиңиздерде албан ийгиликтерди каалайм.

Кыргыз Өкмөтүнүн бардык ишмердиги өлкөнүн экономикалык өсүшү үчүн зарыл болгон шарттарды түзүүгө багытталууда. Бирок объективдүү себептерден улам азырынча социалдык маселелер толук чечиле элек. Бүгүн өлкө калкынын үчтөн бири жакырчылыкта жашайт, жумушсуздуктун деңгээли жогору бойдон калууда.

Мына ушундай жөнөкөй эмес кырдаалда социалдык кызматкерлер өздөрүнүн кайратман эмгеги менен көптөгөн көйгөйлүү социалдык маселелерди чечүүгө көмөктөшүп, калайык калкыбызга арка-жөлөк болушууда.

Коомдун туруктуулугу жана бакубат турмушу көбүнчө социалдык коргоонун деңгээлине жана социалдык кепилдиктердин сакталышына байланыштуу. Ошондуктан социалдык өнүктүрүү Кыргыз Өкмөтүнүн ишмердигинин эң башкы артыкчылыктарынын бири болгон жана болуп кала берет.

Учурдагы социалдык-экономикалык кризиске карабастан, мамлекет социалдык чөйрөгө кеткен чымдарды азайтпастан, тескерисинче, жыл сайын көбөйтүүдө жана өзүнө алган социалдык милдеттенмелерди толук көлөмдө аткарууда. Бул жакшы тенденция мындан ары да ийгиликтүү улантылып, Кыргызстанды социалдык мамлекетке айландыруу үчүн жасалып жаткан аракеттер өз жемишин берерине ишенем.

Бирок социалдык коргоо органдарынын ишмердиги финансы каражаттарын муктаж болгондорго бөлүштүрүү менен гана чектелип калбашы керек. Силердин мүмкүн болушунча натыйжалуу, ачык жана эл менен тыгыз байланышта иштешиңер керек. Бул сфера коррупциядан толук тазаланышы зарыл. Көрсөтүлгөн кызматтардын сапатына жараша бүтүндөй мамлекеттин өнүгүшүнүн натыйжалуулугу жөнүндө пикир жаралат.

Кыргыз Өкмөтү профсоюздарды туруктуу жана ишенимдүү өнөктөш катары, жарандык коомдун негизин түзгөн жана Кыргызстан социалдык-экономикалык турмушуна жигердүү таасири бар жаратман күч катары баалайт.

Кыргыз Өкмөтүнүн, Кыргызстан профсоюздар Федерациясынын жана жумуш берүүчүлөрдүн Ассоциациясынын ортосунда эмгек жана социалдык-экономикалык маселелер боюнча Генералдык келишим бар. Калыптанып калган социалдык өнөктөштүктүн бул жакшы системасы бийликтин, ишкер чөйрөнүн жана профсоюздардын биргелешип аракеттенүүсүнүн механизми катары азыркы шартта өтө зарыл экендигин турмуш далилдеди.

Профсоюздар жаңы жумуш орундарынын негизги булагы болгон кичи жана орто ишкерликти бизнести өнүктүрүү жаатында көп иштерди жасай алат. Эң башкысы, жергиликтүү бийликтер менен тыгыз кызматташып, бул багытта биргелешип аракеттенүү зарыл.

Урматтуу социалдык коргоо жана профсоюздар кызматкерлери!

Сиздерди дагы бир жолу кесиптик майрамыңыздар менен чын жүрөктөн куттуктаймын! Сиздерге чың ден соолук, иштериңиздерге ийгилик, бакубат турмуш, бакыт-таалай каалайм!

Кыргыз Республикасынын

Премьер-министри                                                          Ж. Сатыбалдиев