Бүгүн, 22-ноябрда, Кыргыз Республикасынын Премьер-министри Жоомарт Оторбаев өзгөчө кырдаалдар министри Кубатбек Бороновду кабыл алды. Жолугушуунун жүрүшүндө Кубатбек Боронов Өкмөт башчыга үстүбүздөгү жылдын 14-ноябрында 7 жана 4 баллдык эки ирет жер силкинүүсү орун алган Ысык-Көл облусунун түштүгүндөгү аймакты иликтөө натыйжалары тууралуу маалымат берди. Өз кезегинде Премьер-министр билдиргендей, Ысык-Көл облусундагы жер силкинүү саркындыларын жоюу боюнча маселени ал жеке көзөмөлүнө алган. Жолугушунун натыйжасы боюнча Жоомарт Оторбаев ӨКМ министрине аймакты иликтөө, турак-жайларды жана чарба жүргүзүү субьектилерин жана жер силкинүүдөн түшкөн зыянды эсептеп чыгуу иштерин айдын соңуна дейре жыйынтыктоо тапшырмасын берди. Андан соң Өкмөт башчы Өкмөт Аппаратынын уюштуруу-инспектордук иштер жана жергиликтүү өз алдынча башкаруу бөлүмүнө тез арада жер силкинүүдөн жабыр тарткандарга гуманитардык жардам берүү маселесин иштеп чыгууну тапшырды. КР Өкмөтүнүн Аппаратынын Маалыматтык камсыздоо бөлүмү