Бүгүн, 16-октябрь күнү, Кыргыз Республикасынын Премьер-министри Жантөрө Сатыбалдиев бүгүнкү күндөн тартып толук кандуу иштеп баштаган КР Өкмөтүнө караштуу Мамлекеттик каттоо кызматынын Мамлекеттик персонификациялоо борборуна барды.

«Инфоком» Мамлекеттик ишканасынын башчысы Кирилл Исмаилов Премьер-министрди Борбор ID карталарды чыгарууга толук даяр экендигин кабарлады. Анын сөзү боюнча 40 миңден ашык сурамжылоо баракчаларын толтурган 40 миңден ашык жарандар үч жума аралыгында жаңы ID карта алышат.

Бул борбордо Ж.Сатыбалдиевге ID картаны чыгаруу процессин башынан аягына чейин көргөзүштү, андан соң Өкмөт башчысы бир нече жарандарга Мамлекеттик персонификациялоо борбору даярдаган ID-картаны тапшырды.

«Өкмөт мурун башталган ишти аягына чейин чыгарды жана бүгүн биз персонификациялоо борборунун толук кандуу иштеп жаткандыгына күбө болдук. Азырынча бул борбордо ID карта гана чыгарылат, бирок келечекте бул жерде документтердин бөлөк түрлөрү, анын ичинде жалпы жарандык, чет өлкөлүк паспорт да даярдалат. Өкмөт өлкөдөгү паспорт кризисине жол бербейт», — деди Премьер-министр.

КР Өкмөтүнүн Аппаратынын
Маалыматтык саясат бөлүмү