Бүгүн, 19-октябрда, Кыргыз Республикасынын Премьер-министри Жантөрө Сатыбалдиев Түркия Республикасынын Премьер-министринин  Аппаратынын алдындагы Түркиянын кызматташуу жана өнүктүрүү боюнча башкармалыгынын (ТИКА) Президенти Сердар Чамды кабыл алды.

Жолугушуу учурунда тараптар социалдык жана инфраструктуралык долбоорлорду ишке ашыруу боюнча кызматташтык динамикалуу темп менен өнүгүп жаткандыгын белгилешти. Ошондой эле Премьер-министр ТИКА менен болгон кызматташууну кеңейтүү зарылдыгын белгиледи. Мисалы, Кыргызстанда туризм тармагын дүйнөлүк стандартка жооп бере турган деңгээлге чейин өнүктүрүү.

Ж.Сатыбалдиев ТИКАнын Кыргыз Өкмөтүнүн алдындагы өнүгүү боюнча өнөктөштөр Координациялык кеңешинин ишине жигердүү катышып жаткандыгын канааттануу менен белгилеп, мындан ары да ТИКА аталган Кеңештин алкагында Кыргызстандагы ишмердүүлүгүн активдештирүүгө чакырды.

Сердар Чам Түркиянын Премьер-министри Реджеп Тайип Эрдогандын Кыргызстандын Премьер-министри Ж.Сатыбалдиевге жолдогон жылуу саламын айтты.

ТИКАнын Президенти Кыргызстанга көрсөтүлүп жаткан жардамдар 2012-жылы  өткөн жылга салыштырмалуу эки эсеге өскөндүгүн маалымдады. Ал, мындан ары да ТИКА Кыргызстан үчүн маанилүү болгон социалдык, экономикалык жана инфраструктуралык долбоорлорду иш жүзүнө ашырууда жардам берүү улантылаарын убада кылды.

КР Өкмөтүнүн Аппаратынын
 маалыматтык саясат бөлүмү