Кыргыз Республикасынын Премьер-министринин милдетин аткаруучу Сооронбай Жээнбеков Жергиликтүү жамааттар күнү менен куттуктады. Төмөндө Сооронбай Жээнбековдун куттуктоосу: “Урматтуу жергиликтүү өз алдынча башкаруу органдарынын кызматкерлери! Сиздерди Кыргыз Республикасынын Өкмөтүнүн атынан кесиптик майрамыңыздар – Жергиликтүү жамааттар күнү менен куттуктайм! Жергиликтүү өз алдынча башкаруу органдары чейрек кылым ичинде бир топ алгылыктуу иштер жүргүзүштү. Алар аймактарды өнүктүрүүнүн жана калкты социалдык жактан коргоонун багыттарын аныктап келишет, жер-жерлерде социалдык-экономикалык абалды, маданий жагдайды жакшыртуу боюнча иштерди аткарып жатышат. Жергиликтүү өз алдынча башкаруу органдарына мыйзам тарабынан бир кыйла чоң укуктар берилгени - өлкөбүздө демократиянын өнүгүп жаткандыгынын дагы бир күбөсү. Элдин көйгөйлүү маселелерин жеринде чечүү менен өлкөнү өнүктүрүүгө кошуп жаткан чоң салымыңар үчүн ыраазычылык билдирем. Баарыңыздарга үй-бүлөлүк бакыт, бекем ден соолук, узун өмүр каалайм!».

Кыргыз Республикасынын Өкмөтүнүн Аппаратынын маалыматтык камыздоо бөлүмү