«ЕАЭБдин биздин өлкө үчүн экспорттук потенциалын жана мүмкүндүгүн толук пайдалануу, жаңы сатык рынокторун издөө жана ага чыгуу максатында Өкмөт Инвестицияларды тартуу жана экспортту алга жылдыруу боюнча бирдиктүү институтту түзөт», — деп билдирди Кыргыз Республикасынын Премьер-министри Сооронбай Жээнбеков бүгүн, 28-апрелде, Кыргыз Республикасынын Жогорку Кеңешинин жыйынында 2015-жылкы Өкмөттүн аткарган иштери тууралуу отчеттук баяндамасында.

Ал белгилегендей, бул институт ар-бир экспортер менен иш алып барат.

«Өткөн жумада мен Казакстан менен чектешкен «Ак-Тилек» көзөмөл-өткөрмө пунктуна бардым. Андагы реалдуу абал мамлекеттик органдар сүрөттөтөп жаткандагыдан айырмаланат. Унаалардын кезеги, инфраструктуранын тийиштүү деңгээлде эмес экендиги, чекара, бажы жана салык кызматтарынын иретсиз иши экспортерлор үчүн белгилүү тоскоолдуктарды жаратууда» — деди Сооронбай Жээнбеков.

Премьер-министр белгилегендей, көзөмөл-өткөрмө пункттарын тартипке келтирүү үчүн ар-бир пункт боюнча конкреттүү чаралар иштелип чыгат. Сооронбай Жээнбеков кошумчалагандай, кыргыз-казак чекара тилкелериндеги ветеринардык көзөмөлдү алып салуу жана Кыргыз Республикасы үчүн келечектүү тармактар боюнча бирдиктүү бажы тарифи боюнча алымдар тизимин кеңейтүү иши активдештирилет.

КР Өкмөтүнүн Аппаратынын

маалыматтык камсыздоо бөлүмү