Кыргызстандын төрт жаранынын кармалышы боюнча фактыга байланыштуу кырдаал, жалпы чек ара боюнча маселелер өлкө жетекчилигинин көзөмөлүндө турат. Бул тууралуу Кыргыз Республикасынын вице-премьер-министри Жеңиш Разаков билдирди.

Белгилүү болгондой, Кыргыз Республикасынын Президенти Алмазбек Атамбаев Кыргыз Республикасынын Тышкы иштер министрлигине, күч түзүмдөрүнүн жетекчилерине тийиштүү тапшырмаларды берген. Үңкүр-Тоо боюнча Кыргызстандын позициясы белгилүү – аталган тилке  макулдашылган эмес. Мындан улам  бизге коңшу Өзбекстандын позициясы түшүнүксүз болууда», - деп белгиледи вице-премьер министр.

Ал  Кыргыз  Республикасынын Өкмөтүнүн ыйгарым укуктуу түзүмдөрү азыркы учурда өзбек тарап менен сүйлөшүүлөрдү жүргүзүп жатканын кошумчалады.  «Кыргызстандын кармалган төрт жаранынын жакын туугандары менен үзгүлтүксүз байланышып жатабыз», - деп сөзүн жыйынтыктады Кыргыз Республикасынын  вице-премьер министри Жеңиш Разаков.

КР Өкмөтүнүн Аппаратынын

маалыматтык камсыздоо бөлүмү