Бүгүн, 28-апрелде Кыргыз Республикасынын Жогорку Кеңеши Өкмөттүн 2015-жылы аткарган иштери тууралуу отчетун канааттандырарлык деп тапты.

Отчеттук баяндама менен  Премьер-министр Сооронбай Жээнбеков тааныштырды. Жыйындын жүрүшүндө депутаттар тарабынан Өкмөттүн 2015-жылдагы ишмердүүлүгүнө карата бир катар  сын-пикирлер менен катар сунуштар айтылды.

Эл өкүлдөрү Кыргыз Республикасынын 2017-жылга чейин Туруктуу өнүгүүнүн  стратегиялык долбоорунун алкагында ишке ашырылуучу  долбоорлордун ичинде мал-жандыктарды идентификациялоо иши жүргүзүлбөй жатканын белгилешти.

Өз кезегинде Премьер-министр Сооронбай Жээнбеков Өкмөттүн мындан аркы ишинде депутаттар тарабынан бардык айтылган сын-пикирлер менен кошо сунуштар  эске алынарын, учурда  бир катар келечектүү долбоорлор ишке ашырыла  турганын баса белгиледи.

Талкуунун жыйынтыгында Жогорку Кеңеш депутаттары Кыргыз Республикасынын  Өкмөтүнүн 2015-жылы аткарган иштери тууралуу отчетту канааттандырарлык деп тапты.

КР Өкмөтүнүн Аппаратынын

маалыматтык камсыздоо бөлүмү