Бүгүн, 12-ноябрда, Кыргыз Республикасынын вице-премьер-министри Эльвира Сариева электрондук окуу китептер базасын түзүү үчүн редактордун бетачарына катышты.

Вице-премьер-министр белгилегендей, Билим берүү жана илим министрлиги басма түрүндөгү окуу китептерди чыгаруу менен катар жана бюджеттик каражаттын тартыштыгына байланыштуу ачык түрдөгү электрондук окуу китептердин версиясын ишке киргизүүнү аткарууда.

“Алгачкы электрондук китеп 7-класстар үчүн «Кыргыз тили» окуу китеби аталып, ал электрондук окуу китептерин түзүүгө карата чоң кадам болуп саналат. Бүгүнкү күндө биз мектептерге окутуунун жаңы ыкмаларын киргизүүнүн негизин түзүүбүз керек, ал эми электрондук китептерди түзүү үчүн редактор ачык электрондук окуу китептер базасын түзүүгө өбөлгө түзөт», – деди вице-премьер-министр Эльвира Сариева.

Үстүбүздөгү жылдан тарта бардык жаңы мектептик окуу китептерине карата автордук укук мамлекетке тийиштүү эсептелип, окуучулар китептерди ачык түрдө пайдалана алышат. Ал эми кийинки окуу жылынан тарта башталгыч класстар үчүн айрым китептер электрондук түрдө пайдаланууга жеткиликтүү болуп чыгат.

Белгилесек, 7-класстар үчүн «Кыргыз тили» электрондук окуу китебин иштеп чыгууга окуу китептин авторлору, мектеп мугалимдери жана программаны иштеп чыгуучулар катышкан.

Бетачардын жүрүшүндө электрондук китептерди акысыз пайдалануунун технологиясы көрсөтүлүп, ал кыска мөөнөт ичинде окуу китептин авторлоруна программисттердин катышуусуз электрондук китептерди өз алдынча түзүүгө мүмкүндүк берет.

КР Өкмөтүнүн Аппаратынын

Маалыматтык камсыздоо бөлүмү