Бүгүн, 23-сентябрда, Кыргыз Республикасынын вице-премьер-министри Валерий Диль Бишкек шаары боюнча борбордун кышка карата камылгасын көзөмөлдөө боюнча эки күндүк иш сапарын улантты.

Алгач Валерий Диль бала-бакча жана мектептерди кыдырып, алардын жылытуу мезгилине карата даярдыгын текшерди. Ошол эле кезде ал тарбиялануучуларды жана мектеп окуучуларын Мамлекеттик тил күнү менен куттуктады.

Андан соң вице-премьер-министр Аламүдүн отун базасына барды. Свердлов райондук администрация башчысы Алтынай Өмүрбекова вице-премьер-министрге ар-жылкы көмүргө карата муктаждык 44-50 миң тоннаны түзөөрүн билдирди.

“Бир катар билим берүү мекемелеринде 711 миң сом суммасына терезе пакеттери алмаштырылып, жылуулук трассалары жана жылытуу тармактары оңдолуп, эсептегич аспаптары орнотулуп, жаңыртылган. Мындан ары карай бюджеттик уюмдар оңдоо иштерин жүргүзүүдө дубал, чатыр жана терезелерди жылытууга көңүл бурушу зарыл. Бүгүнкү күнгө карата энергетиканы үнөмдөө жана жылуулатуу иш-чаралары акча каражатын үнөмдөөгө көмөк көрсөтөөрү тууралуу түшүндүрүү иштери жүргүзүлүүдө», — деди Алтынай Өмүрбекова.

Аламүдүн райондук отун базасынын директору Мухамеджан Садыковдун айтымында, жылына алар 20 миң тоннага дейре көмүр сатышат.

“Эгерде талдоо жүргүзсөк, өткөн жылы бир тонна көмүргө карата баа 3400 сомду түзсө, учурда анын 1 тоннасынын баасы жүктөө менен бирге 3600 сомду түзөт», — деди Мухамеджан Садыков.

Кыдырып чыгууда Валерий Диль Бишкек шаарынын чегинде жайгашкан бардык отун базаларына калкка ылайыктуу болушу үчүн 7 күндүк ишке өтүүнү тапшырды.

“Акыркы жылдары республикада калкты көмүр менен камсыздандыруу иши натыйжалуу жүргүзүлүүдө. Эми эң негизгиси – кыштын жакындап калышына таянып, көмүргө карата баа негизсиз жогорулатылбашы керек. Эч кандай бааларды жасалма түрдө көтөрүү орун албашы керек, бардыгы графикке ылайык жүргүзүлүшү тийиш”, — деди вице-премьер-министр Валерий Диль.

Эки күндүк иш сапарынын жыйынтыгы боюнча вице-премьер-министр борбордун кышка карата даярдыгы бар экендигин белгилеп, “Бишкекжылуулукэнерго” коммуналдык ишканасы тарабынан буу казандарды көмүр менен жылытууга өткөрүү боюнча жасаган ишин маанилүү деп белгиледи.

КР Өкмөтүнүн Аппаратынын

Маалыматтык камсыздоо бөлүмү