Кыргыз Республикасынын Өкмөтү тегирменден унга тартып бүткүл өлкө боюнча базар наркынан төмөн баада сатуу үчүн азык-түлүккө колдоно турган буудайды брондон чыгаруу чечимин кабыл алды. Бул чечим унга, нанга жана нандан жасалган азыктарга болгон бааны төмөндөтүү максатында кабыл алынды. Унду базар наркынан төмөн баада сатуу  эртеңки күндөн тартып башталат. 1-сорттогу ундун киллограммы 23 сомдон, 2 сорттогу ун – 17 сом 50 тыйындан сатылат. Унду Кыргыз Республикасынын Өкмөтүнө караштуу мамлекеттик материалдык резервдер фондунун жана мамлекеттик резервдеги азык-түлүккө колдонгон буудайды сактоого милдеттүү болгон ишканалардын өкүлдөрү шаарлардын борбордук базарларында жана калк жайгашкан пункттарда сатышат. Бишкек жана Ош шаарларынан тышкары, ун Кант, Токмок,  Кара-Балта, Жалал-Абад, Кызыл-Кыя, Кара-Көл, Баткен, Каракол, Чолпон-Ата, Балыкчы, Нарын жана Талас сыяктуу шаарларда да  сатылат. Андан тышкары ун сатуучу жайлар Кочкор, Ивановка, Токтогул, Бакай-Ата, Кызыл-Адыр жана Ат-Башы калк жайланышкан пункттарда иштейт. сатылуучу жайлардагы ун Кыргыз Республикасынын мамлекеттик резервдер фонду деген жазуусу бар атайын мүшөктөрдө сатылат.

КР Өкмөтүнүн Аппаратынын Маалыматтык саясат бөлүмү