Кыргыз Республикасынын экономика тармактарын жана калкын 2021/2022-жылдардагы күз-кыш мезгилине даярдоо жөнүндө
Экономика тармактарын жана калкты электр жана жылуулук энергиясы, отун ресурстары менен камсыз кылуу, министрликтерди, мамлекеттик комитетти, административдик ведомствону жана республиканын региондорун 2021/2022-жылдардагы күз-кыш мезгилинен өтүүгө өз убагында даярдоо максатында, “Кыргыз Республикасынын Өкмөтү жөнүндө” Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:
1. Кыргыз Республикасынын экономика тармактарын жана калкын 2021/2022-жылдардагы күз-кыш мезгилине даярдоо боюнча иш-чаралардын планы (мындан ары – Иш-чаралар планы) 1-тиркемеге ылайык бекитилсин.
2. Министрликтер, мамлекеттик комитет, административдик ведомство, Кыргыз Республикасынын Энергетика жана өнөр жай министрлигине караштуу “Кыргызкөмүр” жана “Кыргызжылуулукэнерго” мамлекеттик ишканалары, Кыргыз Республикасынын Өкмөтүнүн облустардагы ыйгарым укуктуу өкүлдөрүнүн аппараттары, жергиликтүү мамлекеттик администрациялар жана макулдашуу боюнча: жергиликтүү өз алдынча башкаруу органдары, Бишкек шаарынын мэриясынын “Бишкекжылуулукэнерго” коммуналдык ишканасы, “Улуттук энергетикалык холдинг компаниясы”, “Электр станциялар”, “Чакан ГЭС”, “Кыргызстандын улуттук электр тармагы”, “Түндүк электр”, “Ош электр”, “Чыгыш электр”, “Жалалабат электр”, “Кыргызнефтегаз”, “Бишкек жылуулук тармагы” ачык акционердик коомдору (мындан ары – ААК), “Газпром Кыргызстан” жоопкерчилиги чектелген коому (мындан ары – ЖЧК) жана “Жылуулук камсыздоо” Ош муниципалдык ишканасы:
1) Иш-чаралар планын, электр энергиясын жана кубаттуулуктарды керектөөнүн лимиттерин, графиктерди жана тапшырмаларды 1-21-тиркемелерге ылайык аткарууну камсыздашсын;
2) 2021-жылдын 1-июнуна чейинки мөөнөттө жылытуучу буу казандарынын жана отун-энергетикалык комплексинин ишканаларынын алдыда турган күз-кыш мезгилине иштөөгө даярдыгын текшерүү боюнча Кыргыз Республикасынын Энергетика жана өнөр жай министрлигине караштуу Энергетика, кен көзөмөлү жана өнөр жай коопсуздугу боюнча мамлекеттик инспекциянын өкүлдөрүнүн катышуусу менен жумушчу комиссияларды түзүшсүн (балансында жылытуу буу казандары жана энергетикалык жабдыктардын башка түрлөрү бар мекемелер үчүн);
3) 2021-жылдын 1-июлуна чейинки мөөнөттө белгиленген тартипте бюджеттик мекемелер үчүн отунду мамлекеттик сатып алууга конкурс өткөрүү боюнча чараларды көрүшсүн жана алар менен келишимдерди түзүшсүн;
4) ай сайын отчеттук мезгилден кийинки айдын 10унан кечиктирбестен ушул токтомдун аткарылышы боюнча Кыргыз Республикасынын Энергетика жана өнөр жай министрлигине айдын 1ине карата абал боюнча маалыматты, анын ичинде көмүр сатып алуу боюнча конкурс өткөрүү жөнүндө, отун камдоо боюнча пландык тапшырмалардын аткарылышы тууралуу, отун базаларын түзүү жана көмүрдүн баасын көрсөтүү менен сатуу пункттарын уюштуруу боюнча маалыматтарды берип турушсун. Кыргыз Республикасынын Энергетика жана өнөр жай министрлигине маалымат берүү жана ал маалыматтын тактыгына болгон жоопкерчилик министрликтердин, мамлекеттик комитеттин, административдик ведомствонун жетекчилерине, Кыргыз Республикасынын Өкмөтүнүн облустардагы ыйгарым укуктуу өкүлдөрүнө, жергиликтүү мамлекеттик администрациялардын жана Кыргыз Республикасынын отун-энергетикалык комплексинин ишканаларынын жетекчилерине жүктөлсүн;
5) отун-энергетикалык ресурстарды керектөөдө чыгымдарды азайтуу үчүн энергияны үнөмдөө жана энергиялык натыйжалуулукту жогорулатуу саясатын ишке ашыруу боюнча чараларды туруктуу негизде көрүшсүн.
3. “Мамлекеттик сатып алуулар жөнүндө” Кыргыз Республикасынын Мыйзамынын 27-беренесинин 2-бөлүгүнө ылайык министрликтердин, мамлекеттик комитеттин, административдик ведомствонун конкурстук комиссиялары, Кыргыз Республикасынын Энергетика жана өнөр жай министрлигине караштуу “Кыргызжылуулукэнерго” мамлекеттик ишканасы (мындан ары – “Кыргызжылуулукэнерго” МИ) “Электр станциялар” ААК (макулдашуу боюнча) 2021/2022-жылдардагы күз-кыш мезгилине даярдык көрүү жана бул мезгилден өтүү убагында “Кыргызнефтегаз” ААК жана Кыргыз Республикасынын Энергетика жана өнөр жай министрлигинин алдындагы “Кыргызкөмүр” мамлекеттик ишканасы (мындан ары – “Кыргызкөмүр” МИ) үчүн Кыргыз Республикасынын аймагында алынган көмүр жана жагуучу мазут менен камсыз кылуу боюнча конкурска катышууда Кыргыз Республикасында салык жана камсыздандыруу салымдарын төлөө боюнча карыздары тууралуу маалыматты берүү жөнүндө талапты колдонууну убактылуу токтотушсун.
4. Кыргыз Республикасынын Экономика жана финансы министрлигине караштуу Монополияга каршы жөнгө салуу мамлекеттик агенттиги 2021-жылдын 1-майына чейинки мөөнөттө:
1) “Кыргызкөмүр” МИ берген тизмеге ылайык Кыргыз Республикасынын отун-энергетикалык комплексинин ишканаларына көмүр берген Кыргыз Республикасынын көмүр казуучу компаниялары үчүн көмүрдүн баасын белгилесин;
2) “Кара-Кече” кени – Балыкчы темир жол станциясы жана
“Мин-Куш” кени – Балыкчы темир жол станциясы – Бишкек шаарынын Жылуулук электр борбору (мындан ары – ЖЭБ) маршруту боюнча автортранспорт каражаттары менен көмүр ташуунун баасын тариф түрүндө аныктасын;
3) Ош шаарынын ЖЭБине, “Кыргызжылуулукэнерго” МИ жылуулук менен камсыздоочу филиалдарына жана Кыргыз Республикасынын Улуттук коопсуздук мамлекеттик комитетинин Чек ара кызматынын аскер бөлүктөрүнө берүү максатында “Кыргызнефтегаз” ААК үчүн “М-100” маркасындагы жагуучу мазуттун баасын белгилесин.
5. Кыргыз Республикасынын Өкмөтүнүн облустардагы ыйгарым укуктуу өкүлдөрү, жергиликтүү мамлекеттик администрациялар, Бишкек жана Ош шаарларынын мэриялары (макулдашуу боюнча) отун базаларынадагы жана калк үчүн көмүр сатуучу пункттардагы көмүрдүн баасына байкоо жүргүзүп турушсун. Көмүрдүн баасы бир айдын ичинде 20 жана андан ашык пайызга кымбаттаган учурда Кыргыз Республикасынын Экономика жана финансы министрлигине мыйзамдарда белгиленген тартипте бааны турукташтыруу боюнча сунуш киргизишсин.
6. Кыргыз Республикасынын Экономика жана финансы министрлиги:
- Кыргыз Республикасынын Өкмөтүнүн облустардагы ыйгарым укуктуу өкүлдөрү, жергиликтүү мамлекеттик администрациялар, Бишкек жана Ош шаарларынын мэриялары тарабынан киргизилген сунуштарга мониторинг жана талдоо жүргүзүүнүн жыйынтыгы боюнча көмүрдүн баасы бир айдын ичинде 20 жана андан ашык пайызга кымбаттаган учурда Кыргыз Республикасынын Өкмөтүнө көмүрдүн баасына мамлекеттик жөнгө салууну киргизүү боюнча сунуш берсин;
- республиканын бийик тоолуу шарттарында жана жетүүгө кыйын алыскы аймактарында жашаган адамдар үчүн 2021-жылы компенсациялык каражаттарды “Кыргыз Республикасынын 2021-жылга республикалык бюджети жана 2021-2022-жылдарга болжолу жөнүндө” Кыргыз Республикасынын Мыйзамында каралган каражаттардын чегинде квартал сайын өз убагында бөлүүнү камсыздасын.
7. Министрликтер, мамлекеттик комитет, административдик ведомство, Кыргыз Республикасынын Өкмөтүнүн облустардагы ыйгарым укуктуу өкүлдөрүнүн аппараттары, жергиликтүү мамлекеттик администрациялар, Бишкек жана Ош шаарларынын мэриялары (макулдашуу боюнча):
1) керектелген электр, жылуулук энергиялары, жаратылыш газы, көмүр жана жагуучу мазут үчүн өз убагында толук көлөмдө акы төлөөнү камсыздашсын;
2) энергетикалык компанияларга аба жана кабелдик электр берүү линиялары өткөн кайтаруудагы зоналарда тоскоолдук жараткан бак-дарактарды кыюуга көмөк көрсөтүшсүн.
8. Кыргыз Республикасынын Улуттук коопсуздук мамлекеттик комитетинин Чек ара кызматы жана Кыргыз Республикасынын Экономика жана финансы министрлигине караштуу Мамлекеттик бажы кызматы коңшу мамлекеттер (Казакстан Республикасы, Тажикстан Республикасы, Өзбекстан Республикасы) менен чектешкен аймактар боюнча өтүүчү электр берүү линияларын жана магистралдык газ түтүктөрүн пландык же авариялык оңдоо зарылдыгы келип чыккан учурда Кыргыз Республикасынын Мамлекеттик чек арасы аркылуу ремонттук-техникалык персоналды, технологиялык жабдыктарды жана шаймандарды өткөрүүгө көмөк көрсөтүшсүн.
9. Төмөнкүлөр үчүн жеке жоопкерчилик жүктөлсүн:
1) электр энергиясын жана кубаттуулуктарды керектөө боюнча белгиленген лимиттерди аткаруу үчүн - Кыргыз Республикасынын Өкмөтүнүн облустардагы ыйгарым укуктуу өкүлдөрүнө, жергиликтүү мамлекеттик администрация башчыларына, Бишкек жана Ош шаарларынын мэрлерине, “Улуттук энергетикалык холдинг компаниясы”, “Түндүк электр”, “Ош электр”, “Чыгыш электр”, “Жалалабат электр”, “Кыргызстандын улуттук электр тармагы” ААКларынын жетекчилерине;
2) электр жана жылуулук энергиялары, жаратылыш газы үчүн акы төлөөнү кечиктиргени үчүн – бюджеттик уюмдардын жетекчилерине;
3) энергиялык жабдууларга ремонттук-калыбына келтирүү иштерин сапаттуу жана өз убагында жүргүзүү үчүн – “Электр станциялар”, “Кыргызстандын улуттук электр тармагы”, “Түндүк электр”, “Ош электр”, “Чыгыш электр”, “Жалалабат электр”, “Чакан ГЭС”, “Бишкек жылуулук тармагы” ААКларынын, Бишкек шаарынын мэриясынын “Бишкекжылуулукэнерго” коммуналдык ишканасынын, “Жылуулук камсыздоо” Ош муниципалдык ишканасынын, “Кыргызжылуулукэнерго” МИнин жетекчилерине жүктөлсүн.
10. “Кыргызжылуулукэнерго” МИ:
1) Кыргыз Республикасынын Энергетика жана өнөр жай министрлигине караштуу Отун-энергетикалык комплексин жөнгө салуу боюнча мамлекеттик агенттик тарабынан белгиленген 2021-жылга карата пландалган техникалык-экономикалык көрсөткүчтөрдүн аткарылышын камсыздасын;
2) 2021/2022-жылдардагы жылытуу мезгили башталганга чейин буу казан жабдууларын жана жылуулук тармактарын оңдоо иштерин аяктоону камсыздасын.
11. “Бишкек жылуулук тармагы” ААКга, Бишкек шаарынын мэриясынын “Бишкекжылуулукэнерго” коммуналдык ишканасына, “Жылуулук менен камсыздоо” Ош муниципалдык ишканасына төмөнкүлөр сунушталсын:
1) Кыргыз Республикасынын Энергетика жана өнөр жай министрлигине караштуу Отун-энергетикалык комплексин жөнгө салуу боюнча мамлекеттик агенттик тарабынан белгиленген 2021-жылга карата пландалган техникалык-экономикалык көрсөткүчтөрдүн аткарылышын камсыздоо;
2) 2021/2022-жылдардагы жылытуу мезгили башталганга чейин буу казан жабдууларын жана жылуулук тармактарын оңдоо иштерин аягына чыгаруу.
12. “Кыргызкөмүр” МИ:
1) 2021-жылдын 26-апрелине чейинки мөөнөттө Кыргыз Республикасынын Экономика жана финансы министрлигине караштуу Монополияга каршы жөнгө салуу мамлекеттик агенттигине көмүрдүн баасын аныктоо үчүн Кыргыз Республикасынын отун-энергетикалык комплексинин ишканаларына көмүр жеткирген көмүр казуучу компаниялардын тизмесин берсин;
2) Кавак күрөӊ көмүрлүү бассейнден Бишкек шаарынын ЖЭБине берилүүчү көмүрдүн сапатын талдоо боюнча аттестацияланган лабораторияны түзүү боюнча чараларды көрсүн;
3) 2021/2022-жылдардагы күз-кыш мезгилине өз убагында даярдануу максатында көмүр катмарын ачуу боюнча иштерди толук көлөмдө аткарууну камсыздоо үчүн Кавак күрөӊ көмүр бассейниндеги иштетилип жаткан участокторду кен транспорттук техника менен комплектесин;
4) Бишкек шаарынын ЖЭБине берилүүчү көмүрдүн сапатын “Электр станциялар” ААК тарабынан көрсөтүлгөн техникалык мүнөздөмөлөргө шайкеш келтирүүнү камсыздасын.
13. “Кыргызнефтегаз” ААКга төмөнкүлөр сунушталсын:
1) 2021-жылдын 26-апрелине чейинки мөөнөттө Кыргыз Республикасынын Экономика жана финансы министрлигине караштуу Монополияга каршы жөнгө салуу мамлекеттик агенттигине Ош шаарынын ЖЭБине, “Кыргызжылуулукэнерго” МИнин жылуулук менен камсыздоочу филиалдарына жана Кыргыз Республикасынын Улуттук коопсуздук мамлекеттик комитетинин Чек ара кызматынын аскер бөлүктөрүнө берүү максатында “М-100” маркасындагы жагуучу мазуттун баасын белгилөө үчүн эсептик материалдарды берүү;
2) Ош шаарынын ЖЭБине, “Кыргызжылуулукэнерго” МИнин жылуулук менен камсыздоочу филиалдарына жана Кыргыз Республикасынын Улуттук коопсуздук мамлекеттик комитетинин Чек ара кызматынын аскер бөлүктөрүнө мүмкүн болушунча кыска мөөнөттүн ичинде жагуучу мазутту зарыл болгон көлөмдө берүүнү камсыз кылуу.
14. “Улуттук энергетикалык холдинг компаниясы” ААКга төмөнкүлөр сунушталсын:
1) “Кыргызстандын улуттук электр тармагы”, “Түндүк электр”, “Чыгыш электр”, “Ош электр” жана “Жалалабат электр” ААКылары менен бирдикте 2021-жылы бюджеттик керектөөчүлөрдүн карыздарын жана республиканын бийик тоолуу шарттарында жана жетүүгө кыйын алыскы аймактарда жашаган адамдарга 2020-жылдын төртүнчү кварталы үчүн төлөнүүчү компенсацияны эсепке албастан, 2021-жылы электр тармактарында электр энергиясынын жоготууларынын деңгээлин “Кыргызстандын улуттук электр тармагы” – 5,5 %га чейин, “Түндүк электр” – 11,0 %га чейин, “Чыгыш электр” – 13,0 %га чейин,
“Ош электр” – 11,6 %га чейин, “Жалалабат электр” – 11,7 %га чейин азайтууну жана дебитордук карыздарды 10 %га чейин азайтууну камсыз кылуу;
2) “Электр станциялар”, “Кыргызстандын улуттук электр тармагы”, “Түндүк электр”, “Чыгыш электр”, “Ош электр”, “Жалалабат электр”, “Чакан ГЭС” ААКлар менен бирдикте 2021-жылга карата Кыргыз Республикасынын Энергетика жана өнөр жай министрлигине караштуу Отун-энергетикалык комплексин жөнгө салуу боюнча мамлекеттик агенттик тарабынан белгиленген пландык техникалык-экономикалык көрсөткүчтөрдүн аткарылышын камсыздоо;
3) Бишкек жана Ош шаарларынын мэриялары, Кыргыз Республикасынын Өкмөтүнүн облустардагы ыйгарым укуктуу өкүлдөрү, жергиликтүү мамлекеттик администрациялар, “Түндүк электр”, “Ош электр”, “Чыгыш электр”, “Жалалабат электр”, “Электр станциялар” жана “Кыргызстан улуттук энергетикалык тармагы” ААКылары менен бирдикте калктын жана менчигинин түрүнө карабастан уюмдардын кызматкерлеринин арасында жалпыга маалымдоо каражаттары аркылуу түшүндүрүү иштерин жүргүзүшсүн:
- Токтогул суу сактагычында суунун топтолушу менен байланышкан жагдай жөнүндө;
- электр энергиясын үнөмдүү пайдалануу, отунду жана энергияны сарамжалдуу жана натыйжалуу колдонуу жөнүндө;
- энергияны үнөмдөө жана отун ресурстарын өз учурунда камдап алуу жөнүндө;
- алдыдагы жылытуу мезгилинен ийгиликтүү өтүү боюнча жүргүзүлүп жаткан иш-чаралар жөнүндө;
- кайтаруу максатында нөөмөттүк, архитектуралык, жарнамалык жана витриналык (авариялыктан тышкары) объектилерди жарыктандырууну өчүрүү боюнча иштерди жүргүзүү жөнүндө.
15. “Кыргызстандын улуттук электр тармагы”, “Түндүк электр”, “Чыгыш электр”, “Ош электр”, “Жалалабат электр”, “Бишкек жылуулук тармагы” ААКларга жана “Газпром Кыргызстан” ЖЧКга төмөнкүлөр сунушталсын:
1) электр жана жылуулук энергиясы, жаратылыш газы үчүн дебитордук карыздары бар керектөөчүлөргө жана электр энергиясын керектөөнүн белгиленген лимиттеринен ашык чыгымдоого жол берген бюджеттик уюмдарга карата белгиленген тартипте тийиштүү чара көрүү;
2) Кыргыз Республикасынын Өкмөтүнүн облустардагы ыйгарым укуктуу өкүлдөрүнүн аппараттары менен бирдикте электр энергиясын жана кубаттуулуктарды пайдалануу лимиттеринен ашырууга жол бербөө.
16. “Газпром Кыргызстан” ЖЧКга төмөнкүлөр сунушталсын:
1) 2021/2022-жылдардагы күз-кыш мезгилинде Бишкек жана Ош шаарларынын ЖЭБин жана Кыргыз Республикасынын керектөөчүлөрүн жаратылыш газы менен үзгүлтүксүз камсыз кылуу;
2) Кыргыз Республикасынын 2030-жылга чейин газ менен камсыздоо жана газдаштыруу боюнча башкы схемасынын алкагында 2021-жылга карата Инвестициялык программанын аткарылышын камсыздоо;
3) 2021-жылга карата Инвестициялык программанын аткарылышы боюнча маалыматты ай сайын Кыргыз Республикасынын Энергетика жана өнөр жай министрлигине берүү.
17. Министрликтер, мамлекеттик комитет, административдик ведомство, Кыргыз Республикасынын Өкмөтүнүн облустардагы ыйгарым укуктуу өкүлдөрүнүн аппараттары, жергиликтүү мамлекеттик администрациялар жана жергиликтүү өз алдынча башкаруу органдары (макулдашуу боюнча) “Газпром Кыргызстан” ЖЧКга Кыргыз Республикасынын 2030-жылга чейин газ менен камсыздоо жана газдаштыруу боюнча башкы схемасынын алкагында 2021-жылга карата Инвестициялык программаны ишке ашырууга көмөк көрсөтүшсүн.
18. “Түндүк электр”, “Чыгыш электр”, “Ош электр”, “Жалалабат электр” ААКларга жергиликтүү мамлекеттик администрациялар менен бирдикте электр энергиясын жана кубаттуулуктарды пайдалануу лимити ашып кеткен, негизги жабдууга күч келген, электр энергиясынын жана кубаттуулуктун тартыштыгы пайда болгон учурларда колдонуу үчүн электр тармактарына күч келүүнү жеңилдетүүнүн графиктерин иштеп чыгып “Кыргызстандын улуттук электр тармагы” ААКга берүү сунушталсын.
19. “Кыргызстан улуттук электр тармагы” жана “Электр станциялар” ААКларга электр энергиясын ири керектөөчүлөр, электр энергиясын дүӊ сатып алуучулар – сатуучулар жана керектөөчүлөр – кайра сатуучулар менен бирдикте электр энергиясын жана кубаттуулуктарды пайдалануу лимити ашып кеткен, негизги жабдууга күч келген, электр энергиясынын жана кубаттуулуктун тартыштыгы пайда болгон учурларда колдонуу үчүн электр тармактарына күч келүүнү жеңилдетүүнүн графиктерин иштеп чыгуу сунушталсын.
20. Төмөнкүлөр күчүн жоготту деп таанылсын:
1) Кыргыз Республикасынын Өкмөтүнүн 2020-жылдын 30-апрелиндеги № 228 “Кыргыз Республикасынын экономика тармактарын жана калкын 2020/2021-жылдардагы күз-кыш мезгилине даярдоо жөнүндө” токтому;
2) Кыргыз Республикасынын Өкмөтүнүн 2020-жылдын 27-октябрындагы № 520 “Кыргыз Республикасынын Өкмөтүнүн 2020-жылдын 30-апрелиндеги № 228 “Кыргыз Республикасынын экономика тармактарын жана калкын 2020/2021-жылдардагы күз-кыш мезгилине даярдоо жөнүндө” токтомуна өзгөртүүлөрдү киргизүү тууралуу” токтому;
3) Кыргыз Республикасынын Өкмөтүнүн 2021-жылдын 19-февралындагы № 55 “Кыргыз Республикасынын Өкмөтүнүн 2020-жылдын 30-апрелиндеги № 228 “Кыргыз Республикасынын экономика тармактарын жана калкын 2020/2021-жылдардагы күз-кыш мезгилине даярдоо жөнүндө” токтомуна өзгөртүүлөрдү киргизүү тууралуу” токтому.
21. Ушул токтомдун аткарылышын контролдоо Кыргыз Республикасынын Өкмөтүнүн Аппаратынын өнөр жай, отун-энергетикалык комплекси жана жер казынасын пайдалануу бөлүмүнө жүктөлсүн.
22. Ушул токтом расмий жарыяланган күндөн тартып он күн өткөндөн кийин күчүнө кирет.
Премьер-министр У.А.Марипов